Tonu Maria, Elizabeth kiangah ahawhna pawi

Lk 1: 39 - 56

39. Tua hunin Maria kithawi-a Judea gam mualtung khuapi khat zuanin a manlangin pai a,

40. Zechariah’ inn ah lutin Elizabeth a hopih hi.

41. Maria’ hopihna Elizabeth in a zak ciangin ama sunga naungek a diang hi. Tua ciangin Elizabeth Kha Siangtho tawh kidimin, aw lian tawh kiko a,

42. “Nangmah in numei khempeuh lakah thupha a ngahnu na hi hi. Na sunga na paai naungek in thupha a ngah hi.

43. Ka Topa’ nu kei’ kiangah hong paina ding zah dongin bang hangin kei’ tungah hih thu hong piang ahi hiam?

44. Bang hang hiam cih leh nong hopihna aw ka zak phetin ka sunga naungek lungdamin a diang hi.

45. Topa in ama tunga a gensa thute tangtung takpi ding hi! ci-a a um numei in thupha a ngah hi,” a ci hi.

Tonu Maria’ Phatna La
46. Tua ciangin Maria in, “Keima kha in Topa a phat hi.

47. Kei hong Honpa Pasian’ sungah ka lungsim a kipak hi,

48. bang hang hiam cih leh, ama silanu’ kiniamkhiatna maipha tawh hong en zo hi. Tu-a kipan a khang a khang in kei thupha ngahnu hong ci taktak ding uh hi.

49. Bang hang hiam cih leh, Vanglian Pasian in keima tungah na lianpite hong bawl khin zo hi. Ama min siangtho hi.

50. Ama hehpihna in amah a kihtate’ tungah a khang a khangin a tung hi.

51. Amah in a khut tawh a thahatna a lak zo hi; amah in a lungsim ngaihsutna uh ah a kiliansak mite a khenthaang zo hi.

52. Amah in miliante a tokhom tung uh pan khiasuk a, miniamte a lamto khin zo hi.

53. A gilkial mite anlim tawh vak a, a haute khut hawm tawh a paikhia sak hi.

54. Amah in ama hehpihna a phawknain a nasem Israel a huh zo hi,

55. i pu i pa Abrahamo a kipan ama suan le khakte’ tungah, ama kamciamsa mah bangin a piang tawntung hi,” a ci hi.

56. Maria in Elizabeth’ kiangah kha thum sung bang taam a, tua khit ciangin a inn ah a ciah hi.
-----------------------------
Tonu Maria bangin midangte ading aki piakhia zo leh huhna apia zo den te ih suah zawh na dingin Tonu tungah huhna ngen ciatni.