St . Thomas Aquinas Pawini (January 28)

Misiangtho Thomas Aquinas in hun khat lai-in aminthang Theology mipil te sung pan khat hi a, 1225 kumin Naples khua gei, Aquino aom aminthang innkuan sungpan suak hi. Monte Cassino Benedict zateih sangah pilna sin masa in, Naples University ah a sangzaw pilna te sin thuah hi. Tua khua a om thuhilhte kipawlna lunglut ahih manin kum (19) aphak ciangin Misiangtho Dominic zateih congregation puantual ngah hi.
Misiangtho Benedic congregation ah alut sak nuam anulepate heh lua uh ahih manin aana takin, thongkia mikhat bangin sam kik uh hi. Ama vocation(Pasian sapna) damdamin abei nading cih ngimna tawh a utein ama omna khan sungah numei khat omsak uh hi. Ahi zongin Thomas in singkhuah tawh tua numei nu hawlkhia hi. Kum (2) asawt khit ciangin a innkuanpihte in ama congregation ah apai kik nading thukim uh hi. 1245 kumin Paris aom, misiangtho Albert kiangah pilna sin dingin sawlna ngah hi. Dai takin aom theihna leh ama gamtatna te hangin “Bawnghai” cih min kiphuah sak hi. Misiangtho Albert in Thomas ii lawmte tai a, “no te in amah “Bawnghai” ci-in na sam uh hi.
Ahi zongin amah in ama aw in leitung ii agamla pen mun nangawn pan ki za ding hi” ci hi. Pilna sin aman ciangin Thomas in mun tuamtuam ah pilna, thungetna leh kiniamkhiatna te tawh thugenin khangto mahmah hi. “Ken..laibu tampite sungpan kasin sangin Topa Jesu singlamteh phungah tampi ka sinzaw hi” ci-in Thomas in gen hi. 1266 kumin Summa Theologiae gelh kipan hi. Nikhat, Pasian tau tungaom singlamteh pan “aw” khat in “Thomas….nangin kei thu hoihtakin na gelh hi. Koi bang mi deih na hiam” ci-in dong a, Thomas in “Topa aw..nanglo adang kakisam kei hi” ci-in dawng kik hi.
Amah in nikhat sung, hun tampi thungetna tawh bei sak a, khat veivei ciangin thungetna sungah khuaphawk lo in omcip hi. 1271 kumin Misiangtho Nicholas pawini Missa biakpiakna bawl laitak, vantungpan mangmuhna khat ngah hi. Tua pankipan laibu gelh nawnlo in alawmte kiangah “Kei vaipuak kamanhun hong tung ta hi. Pasian in kei tungah mangmuhna thu honglah khit pan kei gelh lai te in Buhtu bang bek hi lel hi” ci hi. 1274 kum, Lyon khua thukikupna ah apai na lam kal pan aci na ahih manin anunung Sacramentu sang hi. Siangtho Pumpi asan laitak “ka kha ahonkhia thei Topa, Topa nang nong sang hi.
Ka sinna te, ka thalawpnate leh ka nasepnate in Topa nang kong it man bek in hongpiang hi Topa aw…”ci-in kiko hi. Ninih khit ciangin, kum (49) apha pan Thomas si hi. 1323 kumin Misiangtho in kitangko a, 1880 kumin pilna sinna sangte acing akem misiangtho in ki pulak khia hi. Misiangtho Thomas Aquinas pen sangnaupangte leh huihpi guahpi tuah ciangin hong huh misiangtho in kiciamteh hi.
Misiangtho Thomas Aquinas aw…ko te adingin thu hong ngetsak tan.