St. Martin Tours

St. Martin tangthu tom

St. Martin in 316 kumin, Hungary gam, Pannonia khua-ah suak hi. Rome galkap(zanei) khat ii tapa ahih na leh galkap sung lut lohphamawh cih thukhun hangin galkap sungah lut hi.

Nikhat Amiens ah Sakol tuangin apai na lampi ah khutdawhngen khat khuadam salua in sidektak in aom amuh ciangin agalkap puan thakhatin tumnih suahin tua khutdawh ngenpa alangkhat pia-in silh sak hi. Tua nizan amang sungah khutdawh ngenpa apiak puan, Topa Jesu in silh in aom amu hi. Topa Jesu in Martin ii khutdawh ngen pa tung aa abawl huhna hangin a angtangna thu, it na tawh na hoih asep na hangin alungdamna thu agen khit ciangin mang kik hi.

Martin in apuan piak khutdawh ngenpa pen khutdawh ngen taktak hi lo-in, Topa Jesu a hih na thu atheih ciangin nuam mahmah hi. Tua pankipan ama nasep khawlin Pasian na bek sep nading khentat in atungsiah ah galkap sungpan khawl na ding thu a gen hi. Ahi zongin Barbarian te in Gaul simdingin a ki pat laitak ahih na tawh, kumpi Julian thukim lo-in hi bang in khawlnopna in cihtak lohna hi ci-in gen ahih manin Martin in “Topa Jesu minsuangin galvan keng lo-in galkido na phualah ading’ dingin kiging khol zo ing” ci-in dawngkik hi. A zing ciangin lamdang takin gal te in kilem nang thu hong gen uh hi.

Tua zawh 339 kum ciangin Martin in galkap sungpan kawl nading leh tuisawpna sang nading hun hoih ngah hi. Galkap sungpan atawp khit ciangin Piantit gam ah pai-in zateih lut aa, a innkuanpihte zong Catholic pawlpi sungah lut pih zo hi. St. Hilary in Martin pen dawi te ahawl khia dingin vaipuak pia hi. 371 kumin, Tour khua ii Siadaw dingin kiteel a, Tuucing hoih hih na lak khia zo hi. Zateih sang te phuan in, Seminarian te laihilh in khuano sungaom mite nuntakna zia thupi ngaihsutin lamsang hi.

Siadaw Martin in vantungmi te tawh kimu zel in ki ho zel a, St. Petru leh St. Paulu te tawh zong kimu zel hi ci hi. Tua ban ah thum vei misi sa hing kiksak in, siluang natna nei mi khat damsak a, khut leh khe zaw khat damkik sak hi. Anuntak hun nunung ni-in akhut nih te vantung lamah laamto hi. Sik lup leh nopzaw dinghi aci mi te kiangah “leitung etsuk sangin, vantung lam hong en to sak zaw un” ci-in dawng hi.

Tua khit ciangin ageiah dawimangpa dingin aom mu a, “si duh aa om pa aw, nang an dingin kei hong ngah kei ni teh, kei nang an hi ngei kei ning” ci-in agen kawmin 397 kumin Candes ah si hi. St. Martin pen puan khui mi te a huh misiangtho in kiciamteh hi. Ei mimal khat ciat in zong St. Martin bangin haksatna athuak mite tungah it na tawh thupha abawl zo te ihsuah nading hanciam ciat ni.

Misiangtho Martin aw....Ko te adingin thu hong ngetsak tan.