St. Columbanus

St. Columbanus in 540 kumin, Leinster ah suak hi. Khangno khat ahih mah bangin nungak tampi in amah it thei mahmah uh ahih manin Columbanus in lungsim siangtho numei khat kiangah amah angai nungakte bang ci pelh ding cih huhna anget leh tua numei nu in “Numei te pelh zo dingin ki um na hi hiam?

Eve apelh zo lo Adam thu phawk lo na hi hiam? Dalilah hangin athanem Samsung, Bethsheba hoih na sungah ama thumanna akhahsuah David, numeite ngaihna hangin khemna athuak mipil Solomon cih te naphawk kha hiam? Mi tampi tui akiasak hih gun pan kileh in” ci-in gen hi.

Tua ciangin Columbanus in a innkuanpihte nusia in zateih lut hi. Kum (45) aphak pawl in Piantit, Italy te ah pai-in Pasian thu tangko hi. Tua banah thukhun a khauh mahmah zateih sang tampi phuan hi. Numei te leh lengla te zateih huang sungah lut sak lo in, zateih te in zong amau nasep tawh kituak an leh tui te bek ne thei uh hi.

Amau te in Pasian aphawk tawntung nading uh leh leii tawh akibawl thei mawhnate apelh zawh nadingun, ni khat sung in atam zaw lungsim kidekna nei uh hi. A man agen in ah “mihing te in midangte thu kikupna, a val lua in midangte thu gen na te sangin adang bangmah deih lo hi.

A hoih apha akhen thei lo kam leh leii anei mi-in dai takin om huai hi. A hih kei leh amau te gen thu in kilemna a khangto sak thu leh la ahih ding kilawm hi” ci-in gen hi. Columbanus in 615 kumin, Bobbio zateih sangah si hi. St. Columbanus pen Motorcyclists te a huh misiangtho in kiciamteh hi.

Misiangtho Columbanus aw....Ko te adingin thu hong ngetsak tan.