St. Andrew

Nungnuipi St. Andrew in Galilee gam, Berhsaida khua ah AD 5- AD 10 hunin suak hi. Andrew cih na pen Pasal citak leh hangsan cih na hi. Amah in Jonah ii ta hi-in, St. Simon tawh unau hi. Topa Jesu in tuisawpna asang khit ciang, ama kiangah “Topa, nang koi ah om na hiam?” ci-in St. Andrew in dong hi.

A zing ciangin a upa Simon kiangah pai-in, “ko te in Mesiah ka mu uh hi” ci-in gen in a upa zong Topa Jesu kiangah paipih hi (Jn 1: 35-42). Khasiangtho Pasian hong kum ni ahi, Pentecost pawi man khit ciangin Andrew in mun khempeuh ah pai-in lungdamna thu tangko kawikawi hi.

Pawlpi in akhangkhang in hong hilh ahi, Pawlpi ngeina ii gen na ah St. Andrew in Greek gam, Patras ah AD-60 hunin, (X) lim, Singlamteh tungah khai-in thahna thuak hi. Amah in tua singlamteh tung panin asih ma ninih sung Pasian thu gen lai hi. St. Andrew pen Russia gam, Greek gam leh Scotland gamte acing akem Misiangtho in ki ciamteh hi.

St. Andrew bangin mite, ih innkuanpihte Topa kiang apuak zo te ih hih zawh nading Misiangtho Andrew kiangah huhna ngen ni.

Misiangtho Andrew aw...Ko te adingin thu hong ngetsak tan.