St. Aloysius Gonzaga Biakna mipil (1568-1591), June 21

Mi Siangtho Aloysius Gonzaga aw, kote ading in thu hong nget sak in.

Aloysius, Marquis Ferdinand tapa upen hi-a, 1568 kum March kha ni 9 ni-in Italy gam Gonzaga khua ah suak hi. A neu lai-in a nu leh a pa tawh Italy gam-a a nu leh a pa lamsa innpi ah a teeng uh hi. A pa pen Roman Empire ah galkap zalian mahmah galkap mangpi khat hi-a, a neu lai-in a pa tawh galkap sungah sauveipi a om uh hi. Tua ahih manin a kilawm lo a kihhuai kammalte a zang thei zel hi. Tua ciangin a nu in thuhilh ahih manin Pasian simmawhna in bangzahtakin lauhuai hiam, cih thu a thei hi. A nu makaihna tawh Aloysius in thunget nuamsa-in kha thu leh Pasian thu a ngaihsun thei ta hi.

 

Aloysius, a nu leh a pate in Spain gam, Madrid khua-a mipil khat kiangah zum nasep dan a tuamtuamte leh pilna sin dingin a paisak hi. Ama thu bulphuh in, Keimah in a thupi nate aadingin a piang ka hi hi, cih ahi hi. Kum 20 a phak ciangin Gonzaga a, a nu leh a pa neihsa logamte leh a neih a lamh a gamhluahte letmatthuh-in nusia-a, Jesuit siampi kipawlna ah siampi sin dingin siampi sinna sangah a lut hi.

 

A lawmte in mite a hehpihna leh huhna pia dingin kigingsa-a a omnate hangin Aloysius a it uh a, a lungsim siangtho mahmah ahih manin amah a zahtak uh hi.

 

Rome ah Aloysius in mi cinate a kem hi. Tua hangin a sawt lo ciangin natna a ngah hi. Tua natna hanga piang meima in amah nakpitakin a gimsak mahmah hi. Tua natna hangin Aloysius, siampi a suak zo kei hi. A natna a noptuamna dingin singlamteh khat a et kawmin a nuntakna a bei hi. Amah a sihin kum 23 bek pha pan-a, khangnote a cing a kem misiangtho-in kiciamteh hi.

 

Add new comment

14 + 2 =