Singlamteh gualzawhna pawi

Nidanglai in mawhna dan piakna leh sihna lim alak ahi, Singlamteh in Topa Jesu hangin Vantunggam tun na ding kahlei khat hong suak hi. Misiangtho Paul in “ Kote in ka hih uh leh singlamteh tungah khailupna a thuak Christu’ thu tangko ka hih manun Jew mite’ adingin kisuihkhakna khat hong suakin Gentile mite’ aading a haihuai khat hong suak hi. Ahi zongin Pasian’ sapna a ngah Jew mite le Greek mite’ aadingin ahih leh Christu pen Pasian’ pilna le Pasian’ vangliatna ahi hi” (1 Cor 1: 23 – 24) ci hi. (Lk 9 : 23) na sungah “Mi khatpeuh in ka nung hong zuih nop leh amah le amah kinial dinga nisimin ama singlamteh pua-in ka nung hong zui ta hen” ci-in Topa Jesu in gen hi.
Singlamteh gualzawhna pawi pen AD 629 kumin a kimu kik a siangtho vante tawh ki zawituahna nei hi. Topa Jesu a kivui khit ciangin a singlamteh pen, anungzuite in amuh zawh loh na dingin hawk sung khatah koihin lei leh suangtampi tawh vukin sel uh hi. AD 326 kumin Constantine kumpipa Nu ahi, Misiangtho Helena in singlamteh a kiselna mun amuh ciangin tua singlamteh pen a siangtho Biakinn khat ah koih hi. AD 614 kumin Persian minamte in Perlestine gam buluhin tua a manpha singlamteh la uh hi. AD 629 kum ciangin Constantinopel, Empiror kumpi Heracalitus II in Persian minamte gal zo in a siangtho singlamteh pen Jerusalem ah la kik hi. Amah in singlamteh amahmah in a puak nop hangin khuapi sung lutna kongkhak a tun ciangin pai suak zo nawnlo hi. Ama gei ah a om khatin kumpipa kiangah amanpha mahmah kumpi puante tawh Topa Jesu ii singlamteh ii kiniamkhiatna in ki lawm lo hi ci-in gen hi. Tua ciangin kumpipa in a kumpi puante suahkhia in puan hampi silhin singlamteh apuak ciangbekin paisuak zo in tua singlamteh ama mun ah koih kik zo pan hi.