Misiangtho Rose of Viterbo

Misiangtho Rose in Vierbo khua-ah a om, mizawng Italy innkuan sungpan akhangkhia khat ahi hi. Aneu tung pan kipan Pasian thu sungah anungta Rose in kum (8) aphak hunin alamdang mahmah thukhat, a cinat laitakin thuak kha hi. Ama pianna khua sung, lampi dungah ama ii Pasian tawh a kinaina thute tangko in te-ci pang hi. Ama thugente in tua hunlai-in gam vai tawh kisai in haksatna atuak, a lianbel Siampipa adingin huhna tampi pia hi. Thu thei nuam phadeuh mi pawlkhatte in Rose om na inn ah pai-in en sim uh ahih manin a pa in deih lo hi. Tua ahih manin mipi mai ah thu gen ding khaktan hi. Ahi zongin Parish Priest ii hanthotna hangin Rose a Pa in thu gen ding phalna pia kik aa, kha (2) sung, lamdungah Pasian thu gen hi.

Rose in Pasian thu a tangko hi lo hi. Gam sung vai a sai nuam hi ci-in Pope alangpang mite in tangko uh hi. Tua thu hangin buaina hong khang semsem ahih manin Viterbo khua uk pa in Rose dan apiakna in amau innkuan Soriano khua ah ki tuah sak hi.

Emperor kumpi Frederick II asih ciangin Rose ii lamdung aa agen thu te hangin Pope tawh kinialnate zong bei siang aa, Rose te innkuan zong suakta takin a inn uh ah ciah kik uh hi. Rose in Viterbo khua, St. Mary of the Roses biak inn a om, the Poor Clare Convent ah lut zawh nading hanciam hi. Ahi zongin tua lai a nungak siangthote in na nial den uh hi.

Kum (18) gual apha Rose a sih ciangin Podio khua a om, Santa Maria biakinn ah ki vui hi. Kum (5) a sawt khit ciangin 1252 kum, September 4 ni-in ama luang to kik in St. Mary of the Roses nungak siangtho sangah vui kik uh hi. Misiangtho Rose pen vai tuamtuam hangin Gam sungpan a taikhia mite ahuh Misiangtho hi.