Misiangtho Peter Damian Pawini. (February – 21)

Misiangtho Peter Damian in 1007 kumin Italy gam, Ravenna khua-ah suak hi. Aneu tungin a nulepa te in sihsan ahih manin a u te lak pan amah sila bangin bawlin vokte a cingsak a u khat tawh omkhawm hi. Ahi zongin a u khatin hehpihhuaisa ahih manin sangah lai a sin theih na dingin vaihawmsak hi. Peter Damian in a sangnaupang lai-in lai a pil mahmah khat hi aa, Confessor khat ahih ciangin zong pilna ciimna tawh a kidim mikhat ahi hi. Amah in ki deknate leh ki sikkikna te nasiatak in bawlin sumlehpaai piakkhiatna te zong hanciam mahmah hi. Mizawngte amah mah in annek sabuai ah an pia in vak hi.
A sawt lo-in Fonte Avellana a om, Benedict Zateih sangah Peter Damian lut hi. Thungetna, a haksa pen nasepte sepna leh a siangtho na te theih nop, kan nopna te ah lunglut mahmah in sang uk a hih ciangin zong anaupangte lungdaihna, itna leh kiniamkhiatna te hilh cian hi.
1057 kumin ama ii huhna a kisam ahi Pope Stephen IX ii thupiakna a zuihna in Ostia khua ii Siadaw leh Cardinal suahna ngah hi. Kum tawm khat a sawt khit ciangin ama hehpih ngetna hangin Pope Alexander II ii phalna tawh Zateih sangah ciah kik hi. Peter Damian in Pawlpi a puahphat ciangin Pawlpi sungah duhhopna tawh nasepna te nasiatak in langpang hi.
Khat vei Siadaw khat ppfwk&if a kimawl pen Peter Damian in mawhsak ahih manin mawhna dan lohna in Salan la (3) vei simsakna leh mizawng (12) te khe a silsak dingin sawlna ngah hi. Tua ban ah Peter Damian in Zateih te gamdangte ah khualzin in a pai na uh zong diksalo ahih manin Zateih te nuntakna ah daitak in om na in a thupi pen ahih na gen hi.
A kisikkik mawhnei te tawh a om ciangin Peter Damian in nunnem in amaute tawh ki tuakin a om khawm khat ahi hi. Ama gelh lai khat ah “Kong it naupangte aw, lungkia kei un. Note’ tuak gentheih haksatna te in ‘sila’ khat ii gentheihna hi lo-in, Nu leh Pa te ii thu hilhna a ngah naupangte bangin a thuak na hi uh hi. Pasian in hi leitung nuntakna ah mawhnadan hong piakna in tawntung mawhnadan pan hong dal nading ahi hi” ci-in gelh hi. 1072 kumin Faenza khua ah Peter Damian si hi.
Misiangtho Peter Damian aw...Ko te adingin thu hong ngetsak in.