Misiangtho Peter Claver Pawini. (September – 9)

Misiangtho Peter Claver in 1581 kumin, Spain gam, Verdu khua ah suak hi. Kum 20 aphak ciangin, Jesuit Congregation ah lut hi. Kum tawm khat khit ciangin Colombia gam Cartagena khua ah sawlna ngah in, tua khua ah siampi suak in, kum 40 sung, Africa pan sila(sal) dingin a ki zuak mizawng Negro te kha hotkhiat na dingin na sem hi. A mah leh amah Negro te’ sal in a kipia khia hi.
A etteh huai hehpihna
Sila nuntakna tawh a ki bang, nuntak haksatna hunpi ih khawl sak zo kei phial zongin tua bang nuntakna sungah gentheih haksatna tawh a kidim mite ih huh theih, ih panpih theih na ding lampi om ding hi. Tua bangin Sila nuntakna sungah a om mite ama hih theih zahin a huh nuam Spain minam, Jesuit Siampi Peter Claver in Afarica sila te American ah apai theih na dingin kongkhak ahih banah mi tampi apaina Tembaw khawlna mun ahi Cartagena khua ah va tung hi.
Afarica pan alauhuai mahmah tuilam kantanin Cartagena ah apai sila pen kum simin 10000 val bang pha hi. Sila te a zuakte in a vante uh dimtakin a guak khit uh ciangin tua vante kawmah silate kitung, kitang thei lo liangin koih uh hi. Amaute’ zun thak nading, daileng na ding cihte ngaihsut sak lo-in Tembaw tung van guakna munah omsak uh hi. An leh tui a kham pia lo-in simmawh bawlsia lai uh ahih manin sila te seh thum sung pan she nih bang lampi ah si hi. Anungta lai sila te in gimpipi leh lungkia takin Tembaw khawlna a tun uh ciangin lawm hoih khat bek mu uh hi. Tua amaute’ lawm hoih in amah leh amah “Sila te sila” a ki ci Peter Claver ahi hi.
Peter in Tembaw hong tun ciangin en gige in Mawtaw tungah ut lo pipi a ki tuangsak khualzin mite ahuh zawh na ding hanciam hi. Sila te mite mai ah a kizuak laitakin amah in amaute nektheih tuamtaum, za tui za ha te leh a dang akisam van te pia hi. “Ei te’ kam tawh amaute hopih ding ih hanciam ma in ih khut te tawh ih ho masa ding hi” ci-in Peter in gen hi.
Peter in lim leh kam phen mi 7 te zangin tua sila te kiangah Topa Jesu thu tangko hi. Amah in tua sila te kiangah Pasian it na thu te genin amaute ii mihing hihna kiguksak hi cih alungsim sung uh ah a theih, a tel zawh na dingun hanciam takin gen hi. Peter in Afarica pan a tung mi mal 300000 bang apha sila te tuisawpna pia hi. Amah in tua sila te nasepna te ah hawh zel hi. Amaute tawh omkhawm hi. Sila te zuakin sum a zong mi te in Peter pen amaute’ nunak sumzonna ah nawngkai sak dingin hanciam hi ci-in um mawh uh hi. Sila khat gamtat asiat leh Peter ii suktuah man hi ci-in um mawh uh ahih manin tua lai ah Peter a om ding deih lo uh hi.
Peter in Cartagena thong sung aom thong kia te kha hotkhiat na ding in zong na tampi sem a, tua mun ah ama tavuan neih sung in ama kiangah kha lam tawh kisai huhna angen te in hehpihna ngah lo in thahna thuak cih om lo hi.
1650 kum, Plague natna gilo in Peter ii nasepna susia mang hi. Tua munah amah bek kum (4) sung om in 1654 kumin amah a en ding, a khoi ding mi khat zong aom loh hunin si hi. A sih ma in “kei in La no khat bangin ka hi nuam hi. A mah in La no khat hi lel ahih manin bang bang dinmun ah om mah ta leh phun cih om lo hi. Tua mah bangin Pasian nasem te zong ahih ding uh ki sam hi”ci-in gen hi. A mah pen Africa gam a om Negro te a cing a kem misiangtho hi.
Misiangtho Peter Claver aw...Ko te adingin thu hong ngetsak tan.