Misiangtho Peter Chanel Pawini. (April - 28)

Misiangtho Peter Chanel in 1803 kumin Piantit gamah suak hi. Siampi sinna sang a lut ciangin ama Pasian thu hanciamna leh a pilna hangin a Siadawpa’ pahtakna ngah a, a Siadawpa in Peter tawh kisai in hi bangin gen hi. “Peter Chanel in naupang khat bangin upna nei-in, vantungmi khat bangin nungta hi” ci hi.
Siampi suahna angah khit ciangin Crozet ah Parish Priest in kum thum sung Pasian na sem hi. Aman hanciam takin Pasian nasem aa, 1831 kumin gamdang Missionary te kipawlna ahi, Marist kipawlna ah lut in 1836 kumin Oceania ah pai-in Pasian thu tangko hi.
Tua lai ah amaute’ pau sinin ci-nate bawlna tawh Futuna tuikulh a om mite’ upna ngaha, mi tampi Pawlpi sungah kaikhawm in dawi biakna te zong phiat zo hi. Ahi zongin tuikulh a om te ii ulian te in amau thukhun nuai bek ah ami te uh om sak nuam ahih manin dawi biakna pan a taikhiat loh na dingun tha pia den hi.
1841 kumin Futuna tuikulh ulian te in Peter Chanel a thah na dingun agalkapte uh thupia a, galkap te in Peter Chanel manin sat lum uh hi. Thahna athuak ma in Peter Chanel in “kei ka sih hangin phamawh ka sa kei hi. Hih tuikulh ah a zung aki phut Topa Jesu tunga upna in kei sih na hangin kisia zo nawnlo ding hi” ci-in gen hi. Peter Chanel a sih khit kum tawmkhat ciangin tuikulh a om mi te khempeuh in Topa Jesu tanu tapa te suak uh hi.
Misiangtho Peter Chanel aw…kote adingin thu hong ngetsak in.