Misiangtho Matthew

Nungzuipi leh lungdamna laisiangtho at ahi, St. Matthew in Capernaum ah suak hi. A mah pen siahdong khat hi a, Roma te a dingin siahdong ahih manin amah pen thuman lo leh mawh nei khat in ki ciamteh hi. Capernaum khua ah siahdongin aom laitak in Topa Jesu in amah sam a, amah in zong aneihsa khempeuh nusia in Jesu nung zui in nuntakna thak tawh nungta hi.
Topa Jesu in Matthew inn ah a hawh ciangin Pharisee pawlkhat in siahdong te leh mawh nei te tawh kikhawl hi ci-in mawh sak uh hi. A hi zongin Jesu in cidam te in sia vuan kisam lo a, a dam lo te bek in sia vuan kisam hi. “Midik te sam dinga hong pai ka hi kei a, mawhneite sam dinga hong pai ka hi hi”a ci hi,(Mt 9:13). St. Matthew gelh lungdamna laisiangtho in ama muh thu te hong lak kik ahih manin a kicing pen lungdamna laisiangtho hi-in, Hebrew tawh at hi.
St. Matthew in ama at lungdamna laisiangtho pen Topa Jesu ii hong piangna (khang sim na) pan at ahih manin, amah pen mihing khat in kiciamteh a, St. Mark pen Humpi nelkaai in ahi zong in, St. Luke pen Bawng khat in a hi zongin, St. John pen Vasakhat in ahi zongin ki ciamteh hi. St. Matthew in Capernaum khua ah Pasian thu a tangko khit ban ah nisuah na lam ah pai-in Pasian thu atangko na pan thahna thuak hi.