Misiangtho Mary Magdalene Pawini. 1st century (July 22)

Mary Magdalene in sihna pan athokik Topa Jesu amu masa pen ahi hi. Amah in Topa Jesu ii Pasian thugen apaina peuhpeuhah azuiden numeite lak ah a kihel khat ahi hi. Mary Magdalene in numei paktat khat hi ci-in a kigen hangin tua bang ahihna thu teci khat zong omlo hi. Topa Jesu ii khe pen a mit tui tawh sil sakin a sam tawh a nulsak, amin a ki pulak lo numeinu in Mary Magdalene hi kha ding hi ci-in Gregory (Sep-3) in um mawh in gen hi. Lai-at siam te leh la phuak siam pawlkhatin hih thu pen thuman sa-in alungsim sungah kum tampi kem cip ahih manun, mitampi in zong thupiang takpi sa in um uh hi. Lai Siangtho in nisuahna lam pana mipil thumte om na mual in Calvary mual hi (ahih kei leh) numei paktat ahi Mary Magdalene om na mual in Calvary mual hi ci-in gen lo hi.
Mary Magdalene in Galilee tuilii gei aa khuano khat pan hi cih thu, ama minin hong lak hi. Magdalene khua in mitam in sum zonna ding mun hoih mahmah khat hi a, Nga matna, Ngunkuang neu bawlna leh vanzuakna phualpi khat hi. Maria cih min pen numeite min dingin a kiphuak den min khat hi. Laisiangtho sungah Maria cih minnei numei tampi om hi. Magdalen ci-in ama minah a kigawmna in Maria in bang khua, koi mun pan aa Maria hiam cih theih sak nopna hi.
Amah in Topa Jesu tawh akimuh ma-in buaina pawlkhat abawl, apaltat khat hi. Ama sungpan dawi (7) pai khia hi ci-in Luke Lungdamna Laisiangtho in hong thei sak hi. Tua Laisiangtho kammal in kitot kiselna tampi piangsak hi. Ama nuntakna sungah kumsawtpi natna athuak mi khat bangin haksatna pawlkhat thuak kha ding hi cih anunung lamah kitel thei hi.
Maria Magdalene pen Misiangtho khat a suah dongin a siangtho sak thu bulpi in Topa Jesu mahmah in Maria ii it-na takpi tawh ahuhna te muangin a sanna hang ahi hi. Topa Jesu, Jerusalem ah apai nunung lai-in Maria in ompih/kholhpih hi. Topa Jesu a kikhaina Singlamteh phungah amah om hi. Topa Jesu kivuina hanah zong pai den hi. Sihna pan athokik Topa Jesu in amasa pen in amah na hopih hi. Amah in lungleng, khasiatna leh thanemna hangin Topa Jesu amuh tungin huan cingpa sa kha hi. Topa Jesu in ahopih ciang bekin Maria in Topa ahih lam phawk hi.
Misiangtho Mary Magdalene in numeite leh silehsa vai aa simmawhna athuak te ahuh Misiangtho hi.
Misiangtho Mary Magdalene aw....Kote adingin thu hong ngetsak tan.
Tangthu lakna - သူတော်စင်နေ့စွဲများ