Misiangtho Mark

Misiangtho leh Lungdamna Laisiangtho a gelh pa ahi, Mark in Maria ii tapa hi aa, Barnabas ii cousin sanggampa ahi hi. Amah pen Nungzuipi Peter hangin Christian a lut khat ahi hi. Jerusalem a om Mark ii inn pen Christian te a ki bawlsiat hunin a ki khopna uh inn ahi hi.
Pasian nasep a kipat tungin Mark in St. Paul leh Barnabas te tawh ki thuahin tua pan ki thutuah lohna khat hangin Asia Minor pan kikhen uh hi. Kum tampi a sawt dongin Paul in Mark tungah lungkim zo lo aa Mark sam nuam nawnlo hi. Tua bangin kilumkim lohna hangin kikhen uh aa, Barnabas in Mark samin Cyprus tuikulh lam ah pai uh hi. Paul leh Silas te Syria ah pai uh hi.
A nunglam ciangin Mark in amah “Ka tapa” ci-in a sam Peter tawh na sem khawm hi. Mark in Peter tawh ki thuahin Roma ah pai uh aa, tua lai ah thong kia a om Paul tawh ki lem kik uh hi. Pawlpi tangthu sungah Mark in ama gelh Lungdamna Laisiangtho pen Rome ah gelh hi ci-in ki thei hi. Amah in tua Lungdamna Laisiangtho pen Peter ii gen na tawh ki zui-in gelh hi. Tua khit ciangin Egypt ah pai in Alexandria ah Pawlpi phuan hi.
Tua khit ciangin amah in Topa Jesu leh upna adingin mapna thuak aa, suangtum tungah kai gawpin bawlsiatna thuak hi. Thong sung a tun ciangin mang mu aa, tua a mang muhna sungah Topa Jesu a muhna tawh hehnepna ngahin tua lai ah si hi. Kumzalom 9 ciangin Mark ii luang pen Alexandria pan Venice ah pua uh aa, a ma min tawh a ki lam biakinn pi ah vui uh hi.
Misiangtho Mark aw….Ko te adingin thu hong ngetsak tan.