Misiangtho Lydia

Misiangtho Paul ii Pasian thu tangkona in Lydia pen Philippi a om kipawlna khat ah puak hi. Lai Siangtho thak sunga, nungzuipite laikhak sung munkhat bekah tua mun ah a om numei khat ii thu kigelh hi.

“Sabbath ni-in khuapi kongpi pualam ah paikhia-in thungetna ding mun hi-a ka lametna uh gun gei-ah ka pai uh hi. Tua lai-ah ka tut khit uh ciangin kikhawm a om numeite thu ka hilh uh hi. Lydia min nei numei khat in zong ka thugen uh hong ngai a, amah pen Thyatira khua pana puansan zuak Pasian a bia numei khat ahi hi. Tua numei in Paul’ thugen khempeuh lunglut taka a ngaihna dingin Topa in ama lungsim a honsak hi. Amah le a innkuanpihte a kituisawp khit uh ciangin amah in kote’ kiangah, “Topa’ tungah cihtakna nei hi, ci-in nong up uh leh, hong pai unla, ka inn ah hong taam un,” ci-in hong thum hi. (Act 16 : 13 – 15)”

Lydia in puansan zuak khat ahi hi. Tua bangin aman tam mahmah leh aki ngah hak mahmah puansan in mimawkmawk te zat zawh loh ahih manin Lydia in mihau khat hi ding hi ci-in mipil tampi-in ummawh uh hi. Lydia leh alawmte in Aegean gun kiimah om in mihaute’ pi muhna leh zahtakna angah te ahi uh hi.

Lydia in Christian te’ lenglado siamna teci apang, a etteh huai khat ahi hi. Amah in tuisawpna asan khit ciangin Paul leh alawmte ama inn ah zin atung nadingun sam hi. Ama inn pen a innkuanpihte leh Pasian thu tangko a pai te khempeuh in nuamtakin a om theih nadingin atangzai mahmah innpi khat ahih manin amah in ahau mahmah khat hi ding hi ci-in gen uh hi. Lydia in atheih ngei loh khualzin mi te zong ama innkuanpih mah bangin aom theih nadingun lenglado asiam mahmah khat ahi hi. Zindo siamna in Topa Jesu sungah eite in unau sanggamte ih hihna hong telsakna pan hong piang khia ahi hi. Tua bang aa sepna in Christiante ii a sang pen phatna bawlna ahi hi.

Paul in ama Pasian thu tangko na ah atawlngakna mun in Philippi bek ahi hi. Lydia ii zindo siamna in Paul ii Pasian nasepna ah hoihtak asep zawh nadingin panpih hi. Paul in Philippi khuamite kiangah alaikhakna ah “Note kong phawk simin ka Pasian’ tungah lungdam ka ko hi. Note khempeuh’ aading thu ka nget ciangin lungnopna tawh ka ngen tawntung hi. Bang hang hiam cih leh ni masa pen ni-a kipan tu ciang dong lungdamna thu ka tangkona ah kei nong huh tawntung uh hi. (Phil 1 : 3-5)” ci-in khak hi.