Misiangtho Josephine Bakhita Pawini. (Febuary - 8)

Misiangtho Josephine Bakhita in Sudan ah suak hi. Sudan khua mite in amah pen (Nostra Madre Moretta) “Ko mivomte’ Nu” ci-in sam uh hi. 

A nulepa te in amah Bakhita ci-in min pia lo aa, amah sila in a zuak mite in “hauhna/lawhcinna” cih khiatna anei “Bakhita” cih min a piak uh ahi hi. Kum (9) aphak hunin a Nu tawh lo kuanin na asep laitakin amah zawhthawh thu tawh ki gusim hi. Tua alauhuai thu in a nulepa te phuaksak min nangawn mangngilhsak liang hi. Arab mi sila zuakte in El Obeid and Khartoum sumbukte ah amah (5) vei zuak ngei khin uh aa, sila zuakna leh sila te simmawh bawlsiatna tuamtuam te thuak hi. Amah in tua munpan a suahtak nadingin a hanciam hangin amawkna suak hi.

Asawt lo-in Italy minam Callisto Legnani in Bakhita lei in tua pan ama nuntakna nakpitak in hong ki laih hi. Amah simmawh bawlsiatna te zong om nawnlo hi. Amah a cingte in hoihtakin na hopih uh aa, tua munah nasep pen aman nuam sa hi. 

Callisto Legnani, Italy gamah a ciah ding ciangin Bakhita pen Genoa a om, Michieli innkuan te kiangah omsak hi. Tua ahih manin Bakhita in Zianigo ah Michieli te tanu a kem, naukem hong suak hi. Tua khit ciangin Michieli innkuan te in tuipisan a om, Hotel ah a kituah uh ciangin Bakhita in Venice a om, (the Sisters of the Institute of the catechumens) Christian Pawlpi ah lut dingin a kiging mite a makaih nungak siangtho te kiangah om hi.

Tua mun pan Bakhita in a om na ngei Italy innkuante’ ithuai om zia te nung ah Pasian a om na thu mu khia hi. Kha tawmno sung nungak siangtho te in a mah Pasian thu hilh uh a, 1890 kum in tuisawpna Sacramentu sang hi. Tuisawpna a san ciangin “Josephine” cih min thak pia uh hi. Tua ni-in ama nuntakna sungah a nop pen leh a mangngilh ngeiloh ding ni thupi khat ahi hi. Amah in ama nuntakna sung tawntung ah amah tuisawpna a pia hai pen nam den in “Hi mun pan Pasian tanu te sungah khat ka suak hi” ci-in gen den hi.

Bakhita in puankhuina, an huanna, pak suanna leh kongkhak cing cih nasepte semin kum (50) sung Pasian ading kipiakhia in tua sangah na sem in om hi. Kongcing in a om laitak in Bakhita in naupangte sang pan hong ciah sial un, a lu uh damtakin lawngin “hoihtakin om in, Pasian it in. Nang hong thei lo te ading thungetsak in. Pasian theihna in thupha lianpi hi” ci-in thupha pia den hi.

Bakhita a teek kuan ciangin natna tuamtuam nasiatak in thuak hi. Ama cidamna a dong mite kiangah amah in “Pasian deihna bang” ci-in nuih mai tawh dawng den hi. 1947 kumin amah si hi. Ama kammal khat in, “Kei, zawhthawh thu tawh hong sam in sila in hong zuak, hong bawlsiate mu kik leng amaute’ mai ah khukdin in a khut te uh ka nam ding hi. Amaute hangin kei Christian khat a suak ka hi hi” ci hi.

Misiangtho Josephine Bakhita aw… Ko te adingin thu hong ngetsak tan.