Misiangtho Germaine Pawini. (June 15)

Misiangtho Germaine pen 1579 kumin Piantit gam, Pibrac khua-ah lokho innkuan sung panin suak hi. Ama suah khit asawt loin a nu in sihsan pah aa, a pa in it lo pi-in kem in, a nukik in simmawh bawl lai hi.
A nukik in Germaine pen ama tate tawh a kithuah ding phal lo a, innsungah zong lumsak nuam loin bawng ankuang sung ahihkeileh kahlei nuaiah zan giak sak den hi. An zong a kham pia nuam lo-in amau khamval teng bek ne sak aa, Inn sung nasep khempeuh zong semsak hi.
Germaine in bangzah takin a nukik leh a pa tung panin simmawh bawlsiatna thuak mah taleh maitai den lel hi. Germaine in nisimin a pa’ tuute cing kha den aa, tua in ama adingin nasep nuam mahmah ahihi. Banghang hiam cih leh tua bangin gamlakah tuu acin ciangin Pasian tawh nuam takin hun zangh khawm thei a, thungen denin nuamsa mahmah hi. Amah pen lungsim siangtho leh a kiniamkhiat mahmah khat ahihmanin Pasian in nisimin hopih den hi.
Zingsang Missa daak a gin simin Germaine in amah a kem vantungmi kiangah “Kei hong kem vantungmi aw, ka tuute na kepsak inla, ken Missa va ngai ning!” ci-in Missa kah den hi. Amah a kem vantungmi in a tuute na cinghsak takpi a, asi aliam khat zong om ngei lo in, amang zong om ngei lo hi.
Germaine pen a khua sung uh ah misiangtho khatin hong minthang ta hi. A hizongin ama innsungah kuamah in paakta tuan lo ban-ah a nukik in a bawlsiatna suuksak semsem zaw lai hi. Germaine in ama ngah anthemte pen kholin khutdawhngente hawm den hi. Tua thu a zaak ciangin a nukik pen heh tektek hi.
Khatvei phalbi khuavawt mahmah laitakin a nukik in Germaine pen pongmoh guu in ummawh ahihmanin a puan teng suahkhia sak leh a lamdang takin Germaine ii puansilh sung panin paak honkhat hong kia khia ziahziah hi. Tua ni akipan a nulehpate in inn sungah a lum dingin Germaine sam uh aa, ahizongin amah ut lo-in Phalbi cianga a lupna ahi, kahlei nuai mahah lum veve hi.
Kum 22 a phak ciangin kahlei nuaiah Germaine a sisa in kimu hi. A luang kiphumna mun pen mi tampi in mun siangtho in ngaihsun uh a, kumsimin thungen dingin tampi pai den uh hi. Pope Pius IX in Germaine pen Misiangtho suaksak hi.
Misiangtho Germaine pen tagahte leh nawlkhinna a thuak mite ahuh Misiangtho in kiciamteh hi.
Misiangtho Germaine aw...ko te adingin thu hong ngetsak tan.