Misiangtho Francis Xavier

 St. Francis Xavier in Spain gam, Javier khua ah 1506 kumin suak hi. Piantit gam, Paris ah pilna azong laitak in Ignatius of Loyola ii nungzui (7) te lak ah khat ahi hi. Siampi Ordination angah zawh kum 4 asawt hun, 1541 kumin Francis Xavier in India gam ah Pasian thu tangko dingin sawlna ngah hi.

ui lam tawh kha (13) apai khit ciang, Goa khua ah Pasian thugen kipan a, tua khuamite thuman loh na leh siatna te pan dal hi. A diakdiak in mihau pawlkhatte in a sila te uh, mawhnadan lohna a sim ciang, khithungetna gui a zat na uh pen Francis Xavier in nakpitak in thuak hak sa mahmah hi.

Kha (5) asawt khit ciangin amah in ngamat nasepna ahi, (Pearl Fishery Coast) aom, Paravas minamte lak ah thalawp takin Pasian thu gen ahih manin tua lai aom, mitampi-in tuisawpna sang nuam ung ci-in ngen uh hi. Brahman minamte lak ah kha (12) sung, Pasian thu agen khit ciang akikhel, Pawlpi sung alut mi khat bek angah Francis in supnate bang ci sangzawh ding cih zong tel mahmah hi.

1549 kum in, Francis Xavier in Japan gam ah pai aa, tua lai-ah ama sa pen missionary hi. Japan atun ciangin kiniamkhiat na tawh om na in Japan ah lunglut huai lo hi cih a theih ciangin amah in kipuah sitset in gam uk te mai-ah Portugee gam’ palai hing ci-in ki gen hi. Gam uk te, letsong dingin Music tawh kisai van singkuang khat, sabuai tung koih nai khat leh mindal khat apiak khit ciangin mite kiangah Pasian thu gen ding phalna ngah hi.

Francis Xavier ii ngaihsutna leh muhna ah “Pasian thu a um lo mite lak ah Japan gam mite zah in lungsim hoih mi kimu zo lo ding hi” ci hi. Hi bangin Pasian thu tangko na ah a masa lam in khangto mahmah ahih manin gam uk te in lungkhamna leh muan loh na nei uh a, Francis Xavier Pasian thu tangko na khak tan uh hi.

Tua khit ciangin Francis Xavier in China ah Pasian thu tangko dingin khentat hi. Ahi zongin Hongkong, Sancian atun ciangin a ci na in tua lai mah ah 1552 kumin Topa Jesu min lo kawmin si hi. St. Francis Xavier pen missionary te a huh misiangtho in kiciamteh hi.

Misiangtho Francis Xavier aw....Ko te adingin thu hong ngetsak tan.