Misiangtho Frances of Rome

Misiangtho Frances in 1384 kumin Rome khuapi ah suak hi. Nungak Siangtho asuah nop hangin anulepa te thu amangnain kum (13) aphak hunin Lorenzo Ponziani tawh kiteeng hi. Kum (40) sung alawmpa tawh aom khop na ah khat vei bek zong kam kisel, kitelkhial cih om ngei lo hi.
Misiangtho Frances in thungetna, kideknate ahanciam banah mizawngte huhna leh cinate kiangah zong hawhin tha pia zel hi. Ta (3) nei uh a, aneu tungpankipan Christian upna thu te hoihtakin hilh hi. Misiangtho Frances in a tapa Evengelist leh Agnes te’ sihna leh ata neu pen John kimatna te hangin athuak lungkhamnate upna leh lungduaina tawh thuak hi.
1425 kumin Pasian tungah a ki-ap zawh nading leh mizawngte ahuh zawh na dingin Oblate Congregation of Tor de’ Specchi kipawlna phuankhia hi. A lawmpa asih khit ciangin puantual ngahin aniam pen nungak siangtho khatin amau Congregation ah om hi. 1440 kumin Misiangtho Frances si a, Rome khua aom Santa Maria Nova biakinn ah kivui hi. Misiangtho Frances aki vui khit ciangin tua biakinn min kilaih kik hi. Misiangtho Frances pen Christian nupi te ahuh leh mawtaw hawl te ahuh Misiangtho in kiciamteh hi.
Misiangtho Frances aw…Ko te adingin thu hong ngetsak tan.