Misiangtho Euplius

Misiangtho Euplus in AD-304 kumin thumanna leh upna adingin thahna athuak khat ahi hi. Tua hun in Roma kumpi in Christian te abawlsiat mahmah hun ahi hi.

Nikhat, kumpi inn kiim lampi dungah mikhat awng thapaii in tua mipa’ ki ko na aw in Sicily khua, Catania thukhenna zumpi ii gamdaihna nawngkaai sak mahmah hi. Tua bangin a ki awng mi-in Euplus ahi hi. Amah in “kei-in Christian khat ka hi hi. Christian khat ka hih na hangin sihna ka thuak ding ka lawp mahmah hi” ci-in ki ko hi. Tua ciangin kumpi in Euplus a sap nadingin kong cingte thu apia hi.

Euplus in amah thu sit dingin aki thawi kumpipa mai ah atun ciangin Lai Siangtho bu khat akhutah tawi hi. Kumpipa in “tua laibu hiam?” ci-in a dot leh Euplus in “ka khut sunga om na mu hi” ci-in dawng hi. Kumpipa in “hi laibu sunga thu te kua in nang hong hilh hiam?” a cih leh Euplus in “Pasian tapa, ko te’ Topa Jesu kiangpan ka sin hi” ci-in dawng kik hi. Tua ciangin kumpipa in Euplus kha (3) sung thong sungah a koih khit teh adang thu sitna bawl dingin khat vei Euplus sam kik hi.

Kumpipa in “a kikham laibute nang kiangah om lai ahi hiam?” acih leh Euplus in “he..om mah” ci-in dawng hi. Kumpipa in “Koi ah hiam?” acih leh Euplus in “a sungah om hi” ci hi. Tua ciangin kumpipa in nang kiangah aom lai leh hong lak in” acih leh Euplus in ama lungtang kawkin “hi sungah” ci-in gen hi.

Kumpipa heh mahmah aa, Roma milim pasian biak ding athu kim dongin Euplus abawlsiat nadingun anasemte thu a pia hi. Kumpipa in aupna ataisan nadingin Euplus hun pia lai hi. Ahi zongin Euplus in ama upna ataisan nadingin agenna te uh nial ahih manin angawng tanin thahna thuak hi.