Misiangtho Dominic Savio Pawini. (May - 6)

Misiangtho Dominic Savio in Italy gam Riva khua ah 1842 kumin suak hi. A Pa pen Charles Savio hi-a, a nu Bridgid ahi hi. Dominic Savio in kum 5 a phak-a kipan Missa biakpiakna ah (to serve Mass) tazathauh kisin ta hi. Kum 12 a phak ciangin St. John Bosco kiangah pai-in, “Siampi ka suak nuam hi,” ci-in va gen-a, a sawt lo-in amaute gel a kimaingap mahmah lawmta suak uh hi. Dominic Savio in mi hehpih-in maitai den ahih manin a sangkahpihte in it mahmah uh hi.
Dominic in lai hanciam mahmahin Pasian’ thu zong um mahmah hi. A dam lohna hangin tua sangah kum nih bek kah zo-a, tua khit ciang sang tawpin a inn ah tawlnga hi. Amah in kum (12) aphak hunin a masa pen Siangtho Pumpi sanna ngah a, tua ni-in ma nuntakna sungah a lungdam pen ni hi ci-in gen hi. Tua Siangtho Pumpi a sancil ni-a a bawl kiciamna te Dominic in kipletin zui tawntung hi. Tua kiciamna te in-
(1) Keimah in mawhsutna leh Siagtho Pumpi sanna ka nei pahpah ding hi.
(2) Nipini te leh Pawlpi’ ciangtan pawi nite man nei takin ka kemcing ding hi.
(3) Jesu leh Maria te ka lawm hoih pente ka suaksak ding hi.
(4) Mawhna ka bawl sangin ka nuntakna ka piakhiazaw ding hi, cihte ahi hi.
Dominic Savio dam lo-in lupna tung ngakin a om laitak amah in, “A hoih mahmah nate ka mu hi,” ci-in gen hi. Tua hun laitak amah kum 15 pha pan hi. Hih Dominic Savio’ tangthu, St. John Bosco’ gelh ahi hi. Dominic Savio in 1857 kum, March kha ni 9 ni-in si hi. 1954 kumin Pope Pius XII in misiangtho suak hi, ci-in tangko-a, khangnote a cing a kem misiangtho khatin zong kiciamteh hi.
Misiangtho Dominic Savio aw. ..Ko te a dingin thu hong ngetsak in.