Misiangtho Charles Borromeo

Siampi sin sangnaupangte acing akem ahi, St. Charles in Italy gam, Arona khua-ah 1538 kumin suak hi. Kum (22) aphak ciangin apu no Pope Pius IV na in Cadinal leh Milan khua ii Archbishop dingin teel hi. Council of Trent thukikupna ah Charles Makai a, thu kikupna ii khentatna te zong akicingin sep nading lamlak hi. Ama Diocese uksung aom, Parish Priest te in ahun awng sunguh in, amau Parish sung aom khuate ah pai kawikawi-in thuzuite Pasian thu a sinsak na ding uh thupia hi.
Amah in Diocese Seminary sang aphuan masa pen Bishop ahi hi. Charles in apau awkin thu agen zawh nawnloh hun dongin ama thugenna te in mui bun mahmah hi. Amah in thungetna zahtak mahmah a, cik mah hunin nawhsatakin thu ngen ngei lo hi. Missa bawl sungin ka lungsim palang zel aci Siampi khat kiangah “Missa bawl dingin Pasian tau ah napai ma, Vestment laih na (Sacretry) khan sungah bang hih na hiam, bang ci kiging kholh na hi hiam” ci-in a dot ciangin, Bishop khat in aman nasep nei lo hi ci-in gen ahih manin Charles in tua Bishop pa ading in Bishop tawh kisai vaipuak te gelhsak in anungah “Bishop khat in aman sep ding neilo hi-ci thei ding hiam?” cih lai zong gelhbeh hi.
Amah in ama sepna khempeuhah manmanin sem ahih manin ama sepna peuhpeuhah khilhna om lo in manlang takin sem zo hi. Charles in 1576-78 kum sung apiang, Plague natna huamsungah ama neih leh lam te leh Pawlpi van te zuakin mizawngte huh hi. Ahi zongin Charles ii phuahthak thukhun te mun khempeuhah ki sang lo hi. A diakdiak in Siampi te in mukmul kiatsiang ding cih leh aki lawmlo Siampi te thot ding cih te kisang lo hi.
Nikhat thungetna khan sungah thungenin aom laitak, a citaklo Siampi khatin thau tawh kap sim hi. Ahi zongin thautangin apuante bek kha in apumpi ah bangmah liamma angah lohna lamdang takin kimu hi. Charles in kum (46) aphak hun, 1584 kumin Arona khua-ah si hi. Misiangtho Charles pen Seminarian te leh Gilpi natna nei mite ahuh misiangtho in kiciamteh hi.