Misiangtho Callistus I

Misiangtho Callistus in Rome ah suak in, Roma sila khat ahi hi. Khat vei a siapa’ sum mang ahih manin Callistus lau in Rome pan tansim a, ahi zongin Esatia pan kimanin Sadani ah ki puak hi. Tua pan Kumpi Commonducks’ lawm khat ii thumsak na tawh Callistus in suahtakna ngah hi. 199 kumin Pope Zephyrinus khut tungpan Deacon Ordination ngah a, Christian han tawh kisai vaipuak ngah hi. Callistus ii leinuai han ci-in a kisam, tua mun pen Pope te kivuina hi-in, tua in pawlpi’ neih masak pen leitang ahi hi.
Kumpi Julius in milim bia siampi te kiangah laitawh a at khat ah, “Christian te in midang te tungah it na a lahna leh siluang te hoihtakin a vuina uh hangin aminthang uh hi” ci hi. AD-217 kumin Pope dingin teelna ngah a, Callistus in dawi biakna nasia tak do in, midang te’ zi leh ta te mawhna pan hi ta leh, mithatna mawhna pan hi ta leh mawhmaisakna piak nading vaihawm hi. AD-222 kumin St. Callistus in Pawlpi ading leh thuman adingin thatna thuak hi.