Misiangtho Bruno

Misiangtho Bruno in Germany gam, Cologne khuapi ah 1030 kumin suak hi. Carthusian Congregation (The Carthusian Order) tudong ading zawhna in Bruno ii thupha ahi hi. Colonge khua, Cathedal ah hanciam takin na asep zawh ciangin Bruno in ama ii lai sin na ahi, Reims ah lai hilh in om a, tua sang pan ama sangnaupang pawlkhat te in Pawlpi mipil te suak uh hi.

Bruno in Cologne ah ciah kikin zateih khat asuah ciangin ama nuntakna leh nasepna te ah ki khelna tampi om hi. Tua hun pankipan amah kia zateih khat in om hi. Asawt lo-in Grenoble ah kituah hi. Bruno leh alawm (6) te in mi daihna munah amau khat ciat atuam tekin Pasian thu lungngai in aom na uh pen tua lai a Siadawpa in tha pia in pahtawi hi. 1084 kum ciangin Siadawpa in amaute Chartreause cihna munah paipihin tua laiah thunget khop theih nading biakinn khat leh amau te khatta a om theih nading khanneu khat ta lam hi.

Carthusian cih kammal in “Chatreuse” cih kammal pan hong pai ahi hi. Bruno leh alawm te in a khauh mahmah thukhun te zui-in om uh hi. Amaute’ om na ah numeite pai sak lo hi. Amaute kipawlna ah alut te in laibu saal khat leh biakpiakna hai simloh aneih om lo hi.  Amaute in Lai siangtho pen akhut uh tawh gelh ciatciat in amau hun tampi piakhia uh hi. Amau te’ khut tawh gelh Laisiangtho bu (3) tu dongin om lai hi.

Bruno ii sangnaupang lui khat ahi, Pope Urban II in Roma khuapi lui ah pai-in Pawlpi thu te a khentatna ah ahuh dingin Bruno zawn hi. Ahi zongin Bruno in ki ukna leh vaipuak te ah kihel ding nial den hi. Ama lunggulh thu in Carthusian zateih te tawh om khawmin amaute’ nuntak khuasak zia ding lamlahna, mawhna leh hoih lohna tuamtuam te tawh aki pelh na dingun panpihna te ahi hi. Bruno in 1101 kumin Italy gam, Calabria khuapi a om zateih sangah si hi.