Misiangtho Anselm Pawini. (April - 21)

Canterbury khua ii Siadawpa Misiangtho Anselm in 1033 kumin Italy gam, Aosta khua ah suak hi. Kum (27) aphak ciangin Normandy khuapi, Bec a om St. Benedict zateih sangah lut hi. Tua lai ah kum thum sung Pasian thu lungngaihna aneih khit ciangin Caen khua ii sang uk zateih dingin teel na ngah hi.
Zateih dang te in Anselm zateih sang uk dingin kum tawm lua lai hi ci-in a phun uh hangin Anselm in ama hehpihna leh lungduaina tawh makaih zo hi. Anselm pen khangno te lai hilh siam mahmah khat hi aa, lai hilhna ah khantohna om lo hi ci-in a lungneu mahmah a veng zateih khat kiangah “na huan sungah singkung khat na suan khit ciang, akung kiim ah khau tawh hencip le cin ahiangte khangkhia zo ngei lo ding hi. Nang zong tua bang mah in na sang naupangte na kem hi. Lungnopna pia lo-in alau na dingin na khem den hi” ci-in gen hi. Anselm in tua hun lai in aminthang mahmah mipil khat hi a, lai lam tawh kisai pilna ii “Pa” khat ahi hi.
Ama laigelh tampi tak tudongin Pawlpi in kem in, mi tampi in ama laigelhte tungtawn in Pasian thuthuuk tampi theih lawh uh hi. Ama laigelh tampi takt e lakah a minthang pen in “Cur Deus Homo (Bang hangin Pasian pen mihingin hong piang hiam?)” cih thu ahi hi.
Morologue cih khat kia ki ho na cih laibu ah Pasian in a sangpen aki khel ngeilo Pasian ahihna thu leh Prologue cih laibu ah Pasian om hi cih thu, aminthang teci te tawh lakkhia hi. 1093 kumin Siadaw Lan Frane zalaih dingin teelna ngah aa, 1106 kumin Canterbury ah ciah kik in 1109 kumin tua khua ah si hi.
Misiangtho Anselm aw…Ko te adingin thu hong ngetsak in.