Mi Siangtho Tarcisius

Mi Siangtho Tarcisius aw, Kote a dingin thu hong nget sak in.

St. Tarcisius
August 15
         Tarcisius, Rome khuapi ah a teeng hi. Tua hun lai-in Pawlpi a kibawlsiatna hangin Christain-te in leisung hante ah a bawl uh Missa ah amah in a huh hi.
Nikhat Tarcisius in a kiman Christain galhangte’ aadingin Siangtho Pumpi a puak leh lampi ah pawlpi bawlsiate in na man uh-a, a sathuan uh hi. Tarcisius in a Siangtho    Pumpi puak a galte’ khut sung pan a dalna hangin tua lai-ah thuman thutak aading hangsan takin thahna a thuak hi. Christian ngeina om bangin amah pahtawi-in leinuai han sungah a phum uh hi. Hih pen kumzalom thum sunga thupiang ahi hi.
        Tarcisius tungtang-a thupiangte in nidang lai Christain-te in Siangtho Pumpi bangzahin it cih hong phawksak hi. Missa ngaihna leh Siangtho Pumpi sanna in thuman thutak aadingin nuntakna piakkhiat ngamna piangsak hi.
        Tarcisius in naupangte Siangtho Pumpi sacramentu pen a hoih pen leh a deihhuai pen lawm dingin neihna ding hong lak hi. Tarcisius in Topa Jesu itin a nuntakna a piak mah bangin upna hangin a kipiakhia khangno hoih suahna ding amah in hong huh ding hi. Eite in Siangtho Pumpi sacramentu sunga om Jesu i itzawk semsemna dingin misiangtho Tarcisius kiangah thu i ngen ding hi.