Mi Siangtho min Bernadette/Bernadetta tangthu a tom in

Bernadetta min a nei mimal kim tungah (Happy Feastday) ci-in kung muak masa hi. Mi Siangtho min Bernadette/Bernadetta tangthu a tom in. A mah pen Nungak Siangtho hi-in kum (1844 - 1879) kikal sungteng nungta hi. St. Bernadette, 1844 kum January ni (7) ni-in Lourdes khua mizawng innkuan sung pan suak hi. Haaihut natna vei ahih manin sang kah zolo hi. Siangtho Pumpi a sancil ding nangawn pen a natna hangin kum 14 a phak ciang ngah pan hi. 1858 kum February kha (11) ni-in Bernadette in singtom-a a om laitak numei meel hoih mahmah khat suang kuahawm sung khatah a diing a mu hi. Tua numei in puan dum le puankang, puantualpi silh-a, a khe lang nih tuak ah lingpaak khatta a om hi. Amah in Bernadette nuihsan-a amah tawh khi a khin khawm dingin a sam hi. Bernadette in tua numei 18 vei, tua bangin a mu zel hi. Tua numei in Bernadette kiangah leitung mite a mawhnate uh kisikkikin mawhna danlohna bawlin thu a ngetna dingun a vaikhak hi. 1858 kum March kha ( 25) ni, a nunung pen a kilat ciangin tua numei in Bernadette kiangah, Hih leitung ah nopsakna a ngah dingin kamciam ka hong pia kei hi, ahi zongin vantung ah nop-sakna a ngah dingin kamciam ka hong pia hi, a ci hi. Bernadette nung mihonpite in zui-in kuahawm ah khi a khin uh hi. Ahi zongin tua numei, amaute in a mu kei uh hi. Tua numei in Bernadette, leilak a khuatsak hi. Bernadette in leilak a kuat leh Lourdes khua i a lamdang mahmah luineu, tua hun a ki pan a luang hi. A dam lo cinate tua lui ah kisil leh damna ngah uh a, pawl khatte in tua luitui a dawn uh ciangin damna a ngah uh hi. Bernadette in tua numei min a dot leh tua numei in vantung lam ento kawmin, Keimah in mawhcilna a neilo Kumpinu ka hi hi, a ci hi. Kuahawm gei-ah biakinn neu khat a lamna dingin Bernadette a vaikhak hi. St. Bernadette in tua thu khempeuh siampi-uk(bishop)-pa theisak hi. Tua khit ciangin Lourdes khua tawh kigamla lo Nevers khua nungak siangtho sang khat-ah Bernadette va ki-ap hi. Kum (22) a phak ciangin tua sangah a kah thei dingin kisang taktak a, a sih dong tua lai ah a om hi. St.Bernadette in natna thuak den mah tase leh ama nasepte a sih dongin a zawhna ding hanciam tawntung hi. 1879 kumin siangtho takin sih nuamin a si i. A luang pen tua sister sang huang sung mahah kivui hi. 1909 kum September (22) ni a sih khit kum (30) a phak ciangin biakna upate leh zato-mangte tawh a luang a lakkhiat uh leh muat lo-a om a mu uh hi. Tua khit 1919 kum April kha ni (3) ni-in a etkik uh leh kilamdanna omlo, nidanga a et lai uh-a mah bangin a muat loin a om a mu uh hi.

Voice by Miss Rosa

Record and Edit: Mr. Anthony Piang

#Saintoftheday, #Saints, #Bernadette, #RVA, #TedimChinService, #KalayDiocese, #Catholic,