Mi Siangtho John Chrysostom

Daily Homily by Fr. Joseph Zo Mung on St. John Chrysostom Feastday (13.9.2019)

St. John Chrysostom ii Pawini leh Lungdamna Laisiangtho (Lk 6:39-42 ) te thu hong gen hi. Misiangtho John Chrysostom pen Siadaw khat hi-in Doctor of the Church ci-in Pawlpi aa dingin kha lam at Siavuan khat in ki ciamteh hi. A mah pen Constantinople aa Siadaw dingin (AD 397) kum in kiteel hi. A mah in Siadaw a suah ciangin Siampi te om zia leh thuzui te om zia ding kha lam leh upna tawh kisai in tampi tak puah phatna hong bawl in khantohna tampi om hi. Tua a hih manin Empire pa in deih lo in gam pua lam ah thumvei tak hawl khia in a nih vei na pen Amenia gam ah kum (3) sung om in tua pan mundang ah puak dingin a pai pih uh leh lamkal ah a hong nusia ahi hi. A mah pen lai-at lah siam bek tham lo in thugen zong Siam mah mah a hih manin ama min no dingin Greek pau in Chrysostom hi-in Manglai in (Golden Mouth) cih min kipia hi. Ama lai-at na te leh a thugen na te hangin thuzui mi tampi tak te in upna lam ah khan lawhna tampi tak nei tuam uh hi cih thu leh tuni lungdamna laisiangtho tawh ki tuak in mite mawhna, khialhna, hoih loh na te ih muh ding leh ih ngensiat ding baih mah mah ta leh ei te khialhna, mawhna, ih hoih lohna te ih phawk ding ih muh ding pen baih lo hi. A hi zong in eite mittang sunga sing luang mu lo in mite mittang sunga nin them khat ih muh ding baih in zong ih lakkhiat sak nuam hi. A hi zongin Topa Jusu in ei leh ei ih ki puah phat masak ding, ih mittang sunga sing luang ih lak khiat masak ding hong deih. Tua a hih manin mi te ih puah phat ma in ei leh ei ki puah pha masa ni. Misiangtho John Shrysostom aw kote aa dingin thu hong ngetsak tan. Kei leh kei ka ki puah phat zawh na dingin thu hong ngetsak in Lampi hong hon sak in ci-in thungen ciat ni.

#RVA #RVATedimChinService #Loveyourenemy, #LifeofSaint, #MiSiangtho,