Mi Siangtho John Bosco Pawi Ni

St. John Bosco Confessor (1815-1888), January 31 John, 1815 kumin Italy gam nitumna lam Turin khua gei lo mun khat ah a suak hi. A nu leh a pate zawng mahmah uh hi. Amah nisim tai 4 bang a gamlatna khua khat ah khe tawh pai-in sang a kah hi. A sangkah kawmin midangte’ lo ah sum thalawhin a kuan zel hi. Puankhui, moh bawl, khedap khui leh lettama khutsiam nasepte zong a sem hi. Tua bangin kivakna dingin na a sep kawmin sangkah-a siampi sinna sangah zong kahin siampi a suak hi. Sangnaupangte in Fr. John a it mahmah uh hi. Fr. John in sangnaupangte’ kikaihkhopna ding, thu kikupna ding, kimawlna ding leh thungetna ding munte a vaihawm sak hi. Tua tham loin lolai khat pan ansaal lui khat kawmin tua lai-ah inn nei lo mizawng khangnote a omsak hi. Fr. John in tua bangin hanciam-a inn tampi a lam hi. Thungetna, Missa biakpiakna, Siangtho Pumpi sanna leh mawsutnate in khangnote mihoih a suahna dingun lam hoih pen ahi hi, cih a um hi. 1845 kumin khangno 800 val bang a kaikhawm zo hi. Amah pen a sangnaupangte in ‘Don Bosco’ ci-in a sam uh hi. Amah in siampi pawl khat tawh Salesian Siampi kipawlna a phhuankhia hi. Tua siampite in gam tampite ah khangno pattah nasepte a sem uh hi. Amaute in khangnote a nuntak zonna ding uh siamna a sinsak uh hi. Tua khangnote siampi a suak tampi a om uh hi. Tua ahih manin amah, khangnote’ pa, ci-in mi tampite in a thei uh hi. Fr. John Bosco, 1888 kum January kha ni 31 ni-in si-a, 1934 kum, April kha ni 1 ni-in Pope Pius XI in misiangtho suak hi, ci-in a tangko hi. Misiangtho John Bosco aw, Kote aadingin thu hong ngetsak tan. #DailySaint, #Misiangtho, #RVA, #KalayDiocese, #JohnBosco,