Mawhcilna nei lo apiang Tonu pawi

Mihing te tunga abang, mawhcilna pan suahtak na dingin, leitungah hong kum ding Jesu Topa ii hotkhiatna nasepna ah aki hel dingin Pasian kiangpan thupha angah, asiangtho Tonu Maria in mawhcilna neilo in hong piang hi ci-in Pawlpi-in umin sang hi.

Hih thu pen Lai Siangtho leh Pawlpi ngeinate a kisiksan ahih na thu, Pope Pius IX in laimal, kammal te tawh at zawh loh zah dongin alian Pasian (The bull Ineffabilis Deus ) ci-in, 1854 kum, December ni (8) ni-in, thuthuk takin tangko khia hi. Nungak siangtho Maria leh Satan aki thutuah loh na in “Nang leh numei kikal, na suan leh khakte’ kikalah kilangneihna ka koih ding hi. Amah in na lutang hong tuancil dinga, nangin ama khetul na sunim ding hi”(Gen 3:15) ci-in akipat cilin thuciam na om khin hi.

Tua thuciam in Vantungmi-in Maria kiangah thu a zaksakna ahi, “Tua ciangin vantungmi ama kiangah pai-a, “Ave Maria aw, hehpihna tawh na kidim hi. Topa in nang tawh omkhawm a, numei khempeuh lakah thupha a ngah nu na hi hi”(Lk 1: 28) cih tawh a kicing zawin teci hong pia hi.

Elizabeth in Tonu a notsetna “Nangmah in numei khempeuh lakah thupha a ngah nu na hi hi. Na sunga na paai naungek in thupha a ngah hi”(Lk 1: 42) cih laisiangtho kammal in zong kip sak hi. Nidang in Bernard leh Aquinas bangin aminthang mahmah mipil te leh St. Dominic zateih te in Tonu Maria pen mawhcilna tawh hong piang hi ci-in um mawh uh hi.

A hi zongin Duns Scoto bang ahi, St. Francis zateih te in Topa Jesu ii Nu, Tonu Maria in mawhcilna, mawhna them zong bang lo ding hi ci-in um uh a, amau kikal ah kinial na te om ngei hi. 1854 kum in, Pope Pius IX in hih kisel na tawh kisai, “Leitung bup tawh a kisai, Jesu ii hotkhiat na nasepna ah aki hel, Tonu Maria ii piang na in Pasian’ Nu in kihelna hi a, mawhcilna nei lo in apiang ahih na thu” a tangko ciangin tua kinial/ kisel na veng pan hi.

Hih thuhilh na tawh kisai, adeihna ciapteh na pen 1858 kum, Lourdes khua-ah aki lang, Tonu kiangpan mangmuhna a kingah ahi hi. Tua mang amu ahi, Bernadette in Tonu kiangah amin a dot ciangin Tonu in “Kei-in mawhcilna nei lo apiang kumpinu hing” ci-in gen hi.

Mawhcilna nei lo apiang Kumpinu aw....Ko te adingin thu hong ngetsak tan.