Guadalupe Tonu pawi

1531 kumin Tonu Maria in Maxico gam, Guadalupe ah Tuan Diego kici pasalno khat kiangah kilangh hi. December ni (9) ni, zingsang kikhawm ding apai, Tuan Diego in lampi ah a zaknop mahmah Vasa te hamna ‘Aw’ leh it na aw tawh Nu pi khat in “Tuan Diego aw..” ci-in asap na ‘Aw’ za hi. Aman zong kua hi ding hiam cih theih nop na tawh lam gei aom, mualtung a et leh Nivang bangin a tang, suangmanpha tungah dingin aom Tonu Maria amu hi.
Tonu Maria in “mihing te tungah akiteh thei lo it na leh hehpihna tawh it in, huh in, acing akem ding biakinn khat, hih mual tungah lam ding ka lunggulh mahmah hi” ci-in Tuan Diego kiangah gen hi. Tuan Diego in zong, Diocese uk Siadawpa kiangah paipah in athupiang teng agen pah hangin Siadawpa in um lo hi. Tua ciangin Taun Diego, Tonu ki lah na mual ah pai kik in “ a it huai mahmah Tonu aw…hi bangin ahaksa vaipuak pen thunei mikhat peuh tungah kilak le cin amaute in umin sem ding uh hi. Kei-in naupang, mizawng daipam khat ka hi lel hi” ci-in agen hangin Tonu in “kong it ka ta aw… zing ciang, zingsang phalvak tungin Siadawpa kiangah pai kik inla, kei mah in kong sawl ahih na gen in” ci-in sawl hi.
Tua ciangin Taun Diego zong Tonu thumangin Siadawpa kiangah pai kik a, Siadawpa in vangliatna khat alah nading ngen hi. Tua ciangin Tonu in Tuan Diego kiangah kilangh kik in aki muh masakna mun ahi, mual tung aom, Lingpaakte lo in Siadawpa a piak nading gen hi. Tuan Diego in zong Tonu gen bangin mual neu ah pai-in Lingpaak te lo in puan khat sungah koih a, Siadawpa kiangah pia hi.
Siadawpa in zong en dingin aphel leh tua Lingpaak te tungah Tonu Maria hong kilangh hi. Tua bangin amuh ciangin Siadawpa in zong Tonu Maria thugen mangin Biakinn khat lam pah hi. Guadalupe Tonu Maria minthang semsem in American gammite ahuh, Guadalupe Tonu in kiciamteh hi.
Guadalupe Tonu aw…Ko te adingin thu hong ngetsak tan.