Upna leh Lametna kisam

Kong it nu le pa u le nau lawm le gualte tuni i kikup dingin thuhilhna cih thulu nuaipan i mihing hihna tawh Upna leh Lametna a kisap zia i kikum ding hi. I nuntakna dingin nasep silbawl pen ih seploh ih bawlloh a pha mawh leh a kisam mahmah khat ahi hi. Hi nasep silbawlna te ah i lawhcin thei na ding, tupna sawmna te ah i tangtun theihna ding lampi hoih i zon theih ding kisam penpen hi. Lampi hoih mu in, sepna bawlna i kipat ciang a kisam omlai hi, tua in UPNA leh LAMETNA ahi hi. Hih nihte in hong lungmuangsak, hong thalawp sakin i nuntakna hong lamsang thei thu khat ahi hi. Mt 9:29 “Na upna uh bangin note’ tungah hong piang ta hen."
Mt.21:22 "Upna na neih nak-uhleh na nget peuhpeuh uh na ngah ding uh hi."
Lk 17:19 "Tho inla pai in; na upna in nang hong damsak khin zo hi."
Upna leh Lametna a kisap mahmah na mun pawlkhat kikum dih ni:

1. Thu nanget ciangin Pasian in hongpia takpi ding hi cin upna leh lametna tawh ngen in.
2. Cidam lo-in zatui/zaha na nek ciangin damna ngah takpi ning ci-in upna leh lametna tawh ne-in dawn in.
3. Sangkah pilna na zon ciangin hih ka zon pilna in ka nuntakna aa dingin khuavak hi takpi ding hi ci-in upna leh lametna nei in.
4. Khaici vawh, Singkungno suan in na om ciang' hong khangin, gah tampi hongpia ding hi ci-in upna leh lametna nei-in sem in.
5. Khualzinna ahi aa mun khat peuhpeuh na pai ding ciangin na sawmna mun, na paina ding mun ci dam in tung takpi ding hing cih upna leh lametna nei-in thungen kawmin paikhia in.

A za a ngai mimal kim tungah i Biak Topan a nuntak pih dingin thupha hongpia kim ciat ta hen. Ka lungdam.
Laigelh: Anthony Piang