Thum vei

“Tonu Maria thu na theih nop leh lai hilh Siampi te dong in. Tonu Maria koi ci it ding cih na theih nop leh thuzui te dong in.” (Pope Francis)
Nisim in “Ave Maria” thungetna thum vei nget dingin ka neu tung panin ka Nu in hong hilh hi. Hih zahtakna pen nisim pelh lo-in ka bawlna hangin Tonu Maria tungah itna lungsim kei kiangah hong piang hi ci-in ka um hi. Pope Francis (‘She is my mother’ laibu pan)
A taktak in hih “Ave Maria thungetna thum vei ngetna” zahtakna in St. Mechthild of Magdeburbe (1207-1282) tungah Tonu ii kilahna pan hong piang ahi hi. St. Anthony of Padua and Lisbon (1191-1231) in hih zahtaknna pen kum zalom 3 pan kipan in St. Leonard of Port Maurice (1676-1751) in hih zahtakna a ki zelh na dingin semkhia hi ci hi.
Thuzui masa te in zingsang leh nitak hun te ah hih Ave Maria thu ngetna thum vei ngen in pumpi leh lungsim a siangtho na dingin leh sih kuan ciangin Tonu ii hehpihna ngah na dingin huhna ngen uh hi. Hih zahtak piakna in Tonu ii To Thum Pasian khat sungah a ki zopna lahna zong ahi hi. “Vangliatna” Pa, “Pil na” Tapa, “Itna” Kha siangtho cih lim nam thum te, Tonu ii nuntakna sungah a ki muh theih mah bangin Tonu ii hong thunget sakna ah zong a ki mu den thupha nam thum hi.
St. Gertrude of Helfta (1256-1302) ahi, Germany gam pan St. Benedic nungak siangtho khat in “Ave Maria” thu ngetna pen la tawh a sak laitak in Pa, Tapa, Kha siangtho Pasian te’ lungtang sung pan a taang mah mah vaang thum te in Tonu Maria ii lungtang ah a lut mu hi ci-in ama tangthu sungah gelh hi. Tua mangmuhna amuh hun sung mahin aw ging khat zong za hi. “Pa Pasian ii vangliatna, Tapa Pasian ii pilna, Kha siangtho Pasian ii itna hehpihna te khit ciangin Tonu Maria ii vangliatna, pilna leh a ki niamkhiat itna te in kua mah ii dem zawh ding vaang hi lo hi.” (LARRAURI; PEREZ, 1996, p.18)
Hih zahtakna ahi, “Ave Maria” thungetna pen thum vei nget khit ciangin a nuai a thungetna nih te sungpan khat nget ding in Pope Pius IX, Leo XII, Pius X te in hong hanthawn hi.
1. “O Maria, kote Tonu… tuni sung tawntung/ tu zan sung tawntung in mawhna ka pelh zawh na dingin hong kem in.”
2. “O a siangtho Maria…Tonu ii mawh cilna neilo a piangna leh siangtho na hang tawh ka pumpi hong siansuah inla, ka kha hong siangtho sak in.”