Sacramentu bangin na inn hong siangtho sak thei na te

Sacramentu bangin inn hong siangtho sak thei na nam (4) om hi. Tua te in- 1. TuiSiangtho, 2. Thupha kipiasa khuaimei vak, 3. Christu Singlamteh, 4. Topa Jesu Siangtho Lungtang lim te ahi hi.

1. Tui siangtho
Inn sim ah Paska tui siangtho koih ding ki lawm hi. Tua tui siang in muh theih leh muh theih loh dawi gilote panin hong dal hong kem hi. Dawi hawlkhiat ciangin zong ki zang hi. Tua ahih manin tui siangtho in kidalna lum khat ahi hi.

2. Thupha kipiasa khuaimei vak
Inn sim ah a tawm pen thupha kipiasa khuaimei khat koih ding pen ngeina khat ahi hi. Tua in lametna khua vak ahih banah huihpi, lauhuaina pan hong dal hi. Tua khuaimei in Nau pang Jesu, Jerusalem biakinn pi ah a ki-ap na pawini ahi, (February -2) ni aa thupha a kipia khuaimei ahi hi. Kamsangpa Simeon in Tonu kiangah hih naupang in minam te kikal ah khuavak tang sak ding hi ci-in a genkholhna thu hong phawksak hi. Christu ii khua vak in khuamial susia zo in mawhna leh sihna te Topa mahmah in hong hepkhiatsak na zong hong phawk sak hi.

3. Christu Singlamteh
A thupi mahmah khat ahi hi. Singlamteh in Pasian itna bangzahin lian hiam cih hong lah banah dawi, kha gilo lauhuaina pan hong kem hi. Inn sungah dawi a ten loh nangin hong dal hi. Eite in zong haksatna ih tuah hun ciangin singlamteh en kawmin ki lungngai thei aa, tha ki la thei hi. Topa Jesu ii gimthuakna ah ih ki helna thu hong phawksak hi.

4. Topa Jesu Siangtho Lungtang lim
Siangtho Lungtang lim koih bek hilo in Tonu tungtawnin Topa Jesu Siangtho Lungtang tungah ih inn ih ap ding kisam hi. Topa Jesu Siangtho Lungtang tungah ih ngaihsutna, ih ngimna, ih sep ih bawlna khempeuh ih ap masa ding hi. Hi te hangin Topa Jesu pen ei adingin nakhempeuh ahi hi. Tua bangin Topa Jesu in ei ii hihna khempeuh a hong hih ciangin thupha tawh ih kidim ding aa, ih inn zong hong siangtho ding hi.