Dawi mangpa in bang hangin mite sungah lut

Dawi mangpa in bang hangin mite sungah lut ahi hiam?
Laisiangtho sungah nungzuipi Judas Iscariot sungah dawi mangpa a lut na thu tel takin ki mu thei hi. (Lk 22: 3, Jn 13: 27)
A taktak in Judas Iscariot in dawi mangpa khemna a thuak hangin Topa Jesu pen Judah u lian te kiangah a ap hun dongin ama sungah dawi a lut ahi nai kei hi. “Nitak-an nek laitakin dawimangpa in Simon’ tapa Judas Iscariot’ lungsim sungah Jesu a lehhekna ding a guan hi.” (Jn 13: 2)
Dawi mangpa in mi khempeuh lungsim sungah Topa Jesu lehhek nopna lungsim guan hi. Judas in tua dawi mangpa khemna sungah olno takin na kia hi. Bang hang hiam?
Judas ii nuntakzia en lehang -
1. Amah in Topa Jesu nungzui khat himahtaleh amah pen guta khat ahi hi.
“(Amah in mizawngte a khualna tawh a cih hi lo-in amah guta ahih man ahi hi; amah in sum-ip kempa, tua sunga kikoihte ama aadingin a sawkzelzel pa ahi hi.) (Jn 12: 6)
1. Pasian tapa ahi Jesu pen aman um lo hi. A siapa tungah upna neilo ahih manin siampi liante kiangah a siapa azuak ahi hi.
2. Judas in ngimna takpi tawh a siapa lehhek hi. Mihingte ii suakta taka teel theihna pen amah in a hoih lo lam ah zangh hi.
Tua ahih manin hih a tunga nam thum te ahi, guta ahih na, upna a neih lohna leh suakta tak a teel theihna (dawi mangpa ze-etna pen do lo-in ol no takin zuihna) te in dawi mangpa ih sungah hong lut na dingin ol sak mah mah hi.
Dawi mangpa hong lut leh amah in eite ii suakta taka teel theihna pen hong uk zolo hi. Judas in ahih leh lungkia in hong ki hei kik zawh loh hangin Peter in Pasian’ hehpihna ah hong ciah kik zo hi. Misiangtho te nangawn in Peter bang mah in dawi a vei ngei kha ding uh hi. Ahi zongin amaute in suakta taka teel theihna pen hoih takin zangh siamin nisim Missa kahna, mawhsutna, nisim thungetna te tawh a nuntakna uh na kalsuan in na nungta sak uh hi.