Tuithang Khua ah Roman Catholic Pawlpi Hongtun Kum Kum(75)Cin' Diamond Jubilee Pawi(6.4.2024)

Vaidawnna leh Nitak Lengkhawm
******
Siadawpa leh apawl te Tuithang khua ah nitak lam nai (3:30pm) pawlin tungin Tuithang Khua Biakinn mai pan Vaidawnna Zongeina tawh nasia takin ki bawl hi.
Gate pan Pakpiakna, Mainul piak na, Pahtawina Laipi simna, Zindawnna la sak na, Zo ngeina tawh lasakna te ki nei in tua khitteh Ngeina lam in alaam, Laamngui te makaihna tawh Biakinn pi sung ki lut hi.
Biakinn sung pan Siadawpa Vaitun thu gen na lasakna leh Siadawpa tung pan thupha sanna ki nei hi.
Tuithang khua ah Parish Khangnote Pasian thu sinna pen nipi kaal khat sung bang a ki bawl a hih manin vaidawn na ah Khual pan tual pan mi tam mahmah uh hi.
Nitak lenkhopna pen Biakinn khang, huang pua lam, Khua sung Hall pi sungah noptakin ki bawl hi.
Nitak lenkhopna hun sungin Siadawpa in hun hon thu genna nei-in Rev. Fr. Damian Dal in "Ni dang Christian masa te upna leh Tu hun Khangthak Christian te Pasian thu upna leh nuntak zia" cih thulu tawh Kha-an vakna nei hi.
Nitak lenkhopna ah thu gen te leh lasa te, a lam te zong siam thei mahmah uh a hih manin mipi te in tha ngah thei mahmah uh hi.