Monthly Recollection of Diocesan Staff Members (28.7.2023)

Monthly Recollection of Diocesan Staff Members (28.7.2023.....Kalay Diocese Centre, Kalaymyo huam sung aa om Zum nasemte in khakhat khat vei a neih, khacin Pasian thu lungngaihna July 28 ni zingsang nai 9:00 in thungetna leh lasakna tawh kipan hi. KMSS Director Rev. Fr. Andrew Go Nang in zum nasem teng muakna leh hunhon thugenna, tuni hun geelna teng pulakna nei hi.  

Hunhon thugenna khit ciangin Rev. Fr. Francis Thang Za Sing in pasian thu lungngaihna makaih in Laisiangtho sungah "Ni dangin keimah in Pasian le a siangtho nate gensia-in, bawlsia-a ka simmawh bawl ngei hangin kei hong hehpih lai hi. Bang hang hiam cih leh, upna nei nai loin, thuman thutak thei nai lo ka hih manin tua bangin a gamta kha ka hi hi." (1 Timothy 1:13) bulphuhin i neisa pilna leh siamnate Pasian aa dingin zangkhia ding, Lajarus leh mihaupa tangthu ngaihsun in i nuntakna sungah midangte tungah hehpihna neihtheih nading, nasep silbawlna te ah citakin, thumanna leh ki niamkhiatna tawh hanciam ding, Pasian deihna zui aa, i nuntaknate Pasian tungah ap-in, a beisa thute ngaihsun/lungngai aa, mawhna leh khelhnate pan kisikkik in Pasian zuan ding hihang cin hanthotna hongnei hi.

Hih hanthotna a mankhit ciangin Pasian thu lungngaihna leh thungetna, mawhsutnate ki nei aa, 11:00 am in Rev. Fr. Romanus Hau Deih Sut (PP of Khampat no.1) makaihna tawh Missa biakpiakna leh tuni aa kisim Laisiangtho Masa Paikhiatna Laisiangtho sung leh Lungdamna Laisiangtho Matthew 13:18-23 bulphuhin kha-an vakna hong nei in tha kingah mahmah hi.

A mah in Khaici kiatna leihoih hih theihna dingin ki niamkhiatna neih kul ahih na thu, i nuntakna sungah ling a omna thu, Pasian thukham zui aa Pasian ni thupi sak ding cihte tawh kisai -in hilhcian na hong nei hi.

Sun 12:00 ciangin pumpi aa ding annkuang um khopna kinei-in tuni Pasian thu lungngaihna hunpen nuamtakin kizo thei hi. 

By- Anthony Piang