Assumption Intermediate Seminary Sang Pawi (Aug 15, 2023)

Kalay Diocese hongcing hong kem Bishop Felix Lian Khen Thang makaihna tawh August 15, 2023 ni-in Siampi sinna Minor Sang pawi noptak in kibawl hi.

Missa Biakpiakna pen Bishop Felix in makaih in Pasian kammal tawh kha-an vakna pen Rev. Fr. Joseph Ki Khui Om in hong nei hi.

Amah in Vantungah akilato Tonu Maria belin thungetna ii a thupitna a gen kawmin Siampi a suak ding sangnaupangte in Tonu belin thunget ding a kisapna thu te zong gen khia hi.

Tua banah Minor sang a ki hon lai pan ki pan tuni ciang dong hih Assumption Sangpi lamna tawh kisai-in tua hun lai-in Galkap lam pan U Lian khat Kalaymyo a hong pai na ding hang tawh kisai-in a ma hong tun ma in Sikkang khuh nuam limlim a hih manun hoih takin a ki lam manlo ahihna thu zong hong gen khia hi.

Missa Biakpiakna a man khit ciang in inntek Siampipa Fr. Robert Pau Gin Mung (Rector) in lungdamkoh thugenna nei hi.

Tua khitteh hih Minor sang a ki hon zawh kum (25) cinna Jubilee Pawi bawl lai-in a zawh manloh uh (Mualsuang) hih sangah a om ngei sangnaupangte leh a diakdiak in Siampi a suaksa te ki pawlin a bawl khop uh St. John Mary Vienney in naupang khat lampi a lah na Misiangtho lim thupha piakna ki nei hi.

Missa Biakpiakna hunin mi vekpi (300) kim kihel thei hi. Pawisim in a pai mite khempeuh inntek topa in zing-an khamtak in vakin nuam ki sa mahmah hi.

Hih sang kihon zawh kum (25) hun sungin Sangnaupang vekpi gawm (753) pha in tua sung pan (57) Siampi suak uh hi.

Tu laitak aa ih muh Assumption Sangpi pen ( April 4, 2019) kum in mei-in kang ahih manin Fr. John Pau Sian Thang (Former Rector) ii makaihna tawh hoih takin kilam kik-in (Feb 15, 2020) kumin Bishop Felix leh MEP General Superior Rev. Fr. Gilles Reitheinger (Now Bishop) te ii thupha piakna tawh a ki hong ahih manin a thak mahmah lai ahi hi cih thu zong hong phawksak niam ing.

Hih sangpawi noptakin ih bawlna hangin hih Assumption Intermediate Seminary pan Siampi hoih tampi a hong piankhiat zawh nangin thu ngetsak ciat ni.
By Fr. Joseph Zo Mung