Fatima Tonu

1917 kum, May 13 ni-in Fatima khua, naupang thum te tungah Tonu a ki lah lai-in mailam hunah leitungah hong piang ding thu te na gen hi. Tua Fatima ah Tonu in a gen thu te in Catholic leitung ah a lian mahmah ki khelna hong piang sak hi.
Vantungmi a kilahna
1916 kumin Lucia, Francisco leh Jacinta te in tuu cingin a om laitak, vantungmi khat thum vei vilvel mu hi. Tua hun in Lucia in kum 9, Francisco kum 8 leh Jacinta kum 6 pha pan uh hi. Amaute a tuu cinna ah kimawl in a om laitak, huih nakpitak hong nungin singkungte hong ki huang gawp uh hi. Tua laitakin na khat in Tanluan kung lam nehin hong ki khin amaute in mu uh hi.
Lucia in ama muh thu te genkhia kik hi. Kum 14/15 kim apha ding khangno khat, meei bangin kaang sitset in ni vang nuiah hong phulet bangin ki mu hi. Ko kam khat zong ka pau kei uh hi. Amah ko te tawh hong ki nai in a gen in ah-“Lau kei un, kei in kilemna vantungmi hi ing. Kei tawh thu ngen khawm un” a cih khit ciangin amah leitungah khukdin in a lukun sukin om hi. Ko zong amah bangin ka om uh hi. Tua khit ciangin ama hong cih sak bangin ka zui uh hi.
“Ka Pasian aw, nang kong um hi. Nang kong bia hi. Nang tungah kong lamen hi. Nang kong it hi. Nang hong itlo mite, nang tungah lametna a neilo mite, nang hong bialo mite, nang hong umlo mite khempeuh a ding maisakna kong ngen hi.” Tua thungetna teng ka nget khit uh ciangin tua vantungmi diingto in ko tungah hong gen hi. “Hi bangin thungen un. Jesu leh Maria te lungtangte in note thungetna te hong ngai ding hi” ci-in hong gen khit ciangin kong kiangpan vantungmi mang pah hi. Francisco in vantungmi amuh hangin ama gen thu te za lo hi. Kei leh Jacinta bekin ka za uh aa amah ka gen kik uh hi. Tua khit ciangin naupang thumte in naupangte mah bangin kimawl in om kik uh hi.
Anih vei ki muhna
1916 kum, khal hun in Lucia, Francisco leh Jacinta te tui khuk gei ah a kimawl laitak in vantungmi in amaute gei ah hong ki langh in “note in bang hih na hi uh hiam” ci-in dong hi. Tua banah thu ngen un. Nakpitak in thu ngen un. Jesu leh Maria te lungtang te in note hong hehpih ding hi. Asangpen Pasian tungah no leh na thungetna te uh ap den un. Lucia in “Kote in koi ci bang biak apna hih ding ka hi uh hiam” ci-in a dot leh vantungmi in “note hih zawh zahzah na khempeuh ap un. Mawhnadan lohna bangin Pasian tungah ap un. Mawhneimi te a kisikik nang un thungen in ap un. Hi bangin na gam sungah kilemna na ngahsak zo ding hi. Kei in Portugal gam a huh vantungmi ka hi hi. Hi te banah Pasian in note thuak ding haksatna hong puak ciangin san siam un” ci-in gen hi. Lucia in hi thu te a nuai a bangin ciamteh hi.
Vantungmi thu gen te in ka lungsim sung uh ah kip hi. Pasian in kua hiam cih tel zawhna vang khat tawh ki bang hi. Pasian in eite bangzahin hong it aa, eite in amah koi ci bangin hong it sak nuam aa, biak ap na ii thupitna leh biak ap na Pasian in koi ci deih aa, biak apna te sangin zahtakna hangin mawh nei mite Pasian in a ki khel sakna te i tel thei hi.
A thum vei ki muhna
Khal kipat hun, tehno te a suah hun in vantungmi in naupang thum te tawh tuu cinna ah a thum veina ki mu kik hi. Amasa pen ki muhna mun hi aa Cabeco a ki ci na mun ahi hi. Naupang thum te in a tuu te uh a khah khit uh ciangin suangtumpi pangah tawlnga in Khi khin den uh a, tua munah vantungmi tawh ki mu uh hi. Vantungmi in a hilh thungetna pen amaute in ngen den uh hi. Thakhat in vaangtang khat mu vat uh a amauteng thum in diing to in a et uh leh a maute gei ah vantungmi diingin a om mu uh hi. Ama khut vei lamah Chalice tawi in, a tak lamah Singtho Pumpi tawi hi. Siangtho Pumpi pan sisan in Chalice sungah kia suk hi. Chalice leh Siangtho Pumpi pen sang tawi aa, amah mah zong naupangte gei ah khuk dinin amaute a hilh thungetna thum vei ngen hi. Tua khit ciangin vantungmi diing to in Chalice leh Siangtho pumpi pen Lucia sang sak hi. Francisco leh Jescemta te pen Chalice sunga sisan bek dawn sak hi.
Vantungmi in “lungdamna thumanna a neilo mite ii simmawhna nakpi taka a thuak Jesu Topa ii si leh sa ne inla dawn in ci-in a maute pia hi. Amaute’ mawhna khialhna te a dingin mawhnadan lohna bawl unla note’ Pasian lungkim sak un. Tua khit ciangin vantungmi in leilakah bok suk in a tunga a nget uh thungetna pen naupang thum te tawh ngen khawm leuleu hi. Tua zawh ciangin vantungmi mang vingveng hi. Lucia, Jacinta leh Francisco te in hi bangin vantungmi tawh thum vei kimukhawm in Tonu tawh a kimuh na ding uh ki gingkhol sak hi. Hi bangin a kiginkholh na uh hangin amaute in Fatima khua ah Tonu in amaute kiang a kilah ciangin amau sep ding vaipuak te a sem dingin a kigingsa in om ding uh hi.
Lai lakna: KYESE Myanmar