Confession of Bishop & Priests

Mawhsutna pen mawhna pan a kisikkik mite khempeuh aa dingin Topa Jesu in a bawlsak ahih manin thuzui mite bek hilo in Siampi te, Siadaw te in zong mawh a sut den ahi uh hi.

          Mawhna in Pasian tawh hong kikhensak a hih manin mawhnei mite leh Pasian a kizop kik theih na dingin Topa Jesu in Mawhsutna Sacramentu a hong bawlsak ahi hi.

          Mawhna pan a kisikkik mite khempeuh in Topa Jesu thu a zuih uh leh leitung ah mawh a sut ding uh kisam hamtang hi.    

        Banghang hiam cih leh Topa Jesu in Mawhsutna leh mawh maisakna te pen Vantungah puato lo hi. Mawh maisakna pen leitungah nusia hi cih phawk ciat ni.

          Topa Jesu in a nungzuipi te tungah Mawh maisak theih na ding aana pia hi cih pen "(Mt 18:18) A man takpi kong genin ah, leitunga na hen peuhmah uh vantung ah kihen dinga, leitunga na phel peuhmah uh vantung ah kiphel ding hi" hih laisiangtho tung tawn in ih thei khin hi.

         Tua a hih manin Leitung ah Mawh a sut lo te, leitung pan mawh maisakna a ngah lo te in Van tungah zong mawh maisakna ngah lo ding hi cih phawk ciat ni.

       lei ah ih phel te bek vantung ah zong ki phel ding a hih manin leitung ah mawh phel ciat ni.    

          Leitungah mawhsut ding a thadah te pen Topa Jesu ii thu a mang nuamlo te hi cih phawkin Topa Jesu thu ih man zawh nanh hanciam ciat ni.