Misiangtho Gemma Pawini. (April – 11)

Misiangtho Gemma in 1878 kum, March 12 ni-in, Italy gam, Lucca khua ah suak hi. Unau 8 sungpan a 5 na hi aa, nuntak nuam a sa inn kuan te ahi uh hi. Ahi zongin Gemma te unau, innkuan, beh leh phung te in ki liatsakna lungsim neilo in Pasian thu tawh anungta a kalsuan te ahi uh hi. Tua ahih manin Gemma in a neu tung panin Pasian aw za-in, Tonu Maria aw zong za thei hi.
Gemma in amel hoih mahmah numei no khat hi a, tangvalte in lawmngaih thu a va genpih hangin Gemma in ama nuntakna pen ama it Pasian ading in piakhia ding hing ci-in khauh takin nial hi.
Gemma te unau in a nu a dam loh ciangin a unau un a Nu lupna gei ah ki umin thungen den uh hi. Gemma ahih leh a Nu lukhung gei ah khukdin in a Nu cidam na ding thungetsak den hi. A nu dam loh hun sung mahin a nu no zong damlo ahih manin a nuno a kem dingin a ki paisak ciangin Gemma in thumang takin sangin a nuno kem dingin pai hi. Ahi zongin amah a ciah kik ciangin a nu om nawnlo hi.
Inn a tun kik khit ciangin Gemma hong dam nawnlo in a sam te hong pulhin, a bil te in hoih takin khua hong za thei lo hi. Tua bangin natna a thuak laitak in St. Gabriel hong pai-in “na dam nuam hiam? Topa Jesu Siangtho Lungtang kiangah nitak simin upna takpi tawh thungen in. Siangtho Lungtang kiangah Novena na bawl ciangin kei zong hong pai-in nang tawh thu kong ngenkhawm ding hi” ci-in gen hi.
Tua misiangtho ii gen mah bangin Gemma in Novena bawlin thu anget ciangin ama natna te pan damna hong ngah kik hi. Gemma in Pasian tawh ki nai zaw nuam ahih manin nungak siangtho suah ding a lunggulh hangin ama tungah Pasian deihna in nungak siangtho suah ding na hi lo hi.
Gemma in Inn ah a omkawm in thu a nget laitak, Tonu ama kiangah hong ki langh hi. Tonu in ama kiangah “Ka Tapa in nang pen hong it mahmah hi. Thupha khat zong hong pia nuam hi. Kei nang’ Nu in ka om ding hi, nang ka tanu na hi zo ding hiam” ci-in adot kawmin Tonu in ama puantual tawh Gemma tuam suk hi. Tua hun pankipan Gemma in Topa Jesu liamma te ama tungah ngah in natna nasia takin thuak hi.
Ama tunga liamma te pen ni li ni simin suak khia in a zing ciangin liamma te munah a kang bek ta om hi. Amah a it, a deih mi a om mah bangin a deihlo a gensia, a mawhsak mi zong om ahih manin Gemma amah kia dai takin thu anget theih na dingin inn dei khan khat vaihawm sak uh hi. Tua banah ama thuak khak thu te khempeuh a ciamteh na dingin ama kha lam makai pa in ngaihsut hoih pia hi.
Tua bangin inn ah thu ngenkawm in TB natna thuak in om a, kum 25 a phak hun, 1093 kum, April 11 ni-in si hi.
Misiangtho Gemma aw…kote adingin thu hong ngetsak in.