Misiangtho Agnes Pawini. (January - 21)

Misiangtho Agnes in 291 kumin Rome khuapi, Italy ah suak hi. Agnes cih kammal pen Latin kam hi-in, Tuuno cih khiatna nei hi. Tua hi a, Misiangtho Agnes lim a kisuaih nak leh a geiah tuuno lim zong kisuai hamtang hi. Agnes pen melhoih mahmah Christian numei khat ahih manin tangval tampi in heel den uh a, ahi zongin Agnes in a neu tunga kipan anuntak sung khempeuh Pasian adingin siangtho tak a om ding leh pasal neih loh ding na khentat khin hi.
Tua ahih manin amah tawh kiteen nading a gente kiangah a ki mu thei lo vantung mo pa kiangah ki ap khin ahih na gen den hi. Ama lungsim khentatna khel nawnlo ding hi cih a thei khangno te in amah Christian khat ahih na thu gamuk pa kiangah khia uh hi. Kum 12 aphak hun ahi, 304 kumin thukhenpa mai ah samin thu khenna thuak hi. Thu khen mangpa in zolbawl in ahi zongin, khem bawl in ahi zongin aup na a laih nading a genpih hangin misiangtho Agnes in ama upna laih tuan lo, taisan tuan lo hi.
Simmawl bawl siat na ah a kizang, van te lak in alau na ding in ahih uh hangin Agnes in hangsan tak in thuak hi. Tua ban ah numei kizuak te inn ah puak uh aa, ahi zongin amah lawng dingin ahanciam tangval khat amit taw pah hi. Asawt lo in misiangtho Agnes ii ngawng tan uh hi. Misiangtho Agnes in amah a that te kiangah “na tem tunguh ah ka sisan na bang sak zawh uh hangin Topa Jesu ka ap sa ka pumpi nasia sak zo kei ding uh hi” ci-in amah akithat ma in gen hi.
A sisan pen leivui lakah kizeel a, tua kiim a Christian om tengin apuante uh la in Agnes ii sisan lakah diah uh hi. Tua pen Misiangthote sisan ahihmanin vanglian in manpha mahmah hi. Tua khit ciangin a luang hawm pen Nomentana a ki-cih na munah vui uh hi. Tua munah misiangtho Agnes pahtawina in 350 kumin biakinn khat ki lam hi. Agnes nulehpate in khat bekbek aneih uh a tanu sih na hangin dahin lungkham mahmah uh a, lam khat panin kum (12) bek aphak pat hangin Pasian adingin hangsan takin si ngam cih thu in a lung uh kimsak in thalakna in nei zaw uh hi. Christian tampi te in Agnes han amuh sialun hangsan lawh uh hi.
Khat vei, Agnes han ah zan sawt mahmah khit ciang, a nulehpa te leh a lawm hoih pente pai uh a, khukdin in thu anget laitakun vaang khat hong taang a, tua ataang mahmah vaang sungah numeino bekbek hong kilangh in, a vang taang pha mahmah tuuno zong pua uh hi. Tua numeinote pen maitai mahmah uh hi. Tua numeino te a et laitakun Agnes hong kilangh tuam a, a khutnihte tawh tuuno khat atawi hi.
Agnes in “Nulehpa leh ka lawm it te aw, ka sih khit hangin na lungkham nawn kei un. No mah bangin anungta ka hihlam tuin nong mu ta uh hi. Pasian in a hoih penpen omna mun hong pia hi. Amah tawh ka kimu den uh hi. Kap nawn kei in Nu aw, kilungnuam sak inla, nikhat ni ciangin ka omna munah kumukik ding hi hang” a cih khit ciangin mang kik hi. Tua khit ciangin tua munah a paiteng, lungnuam takin ciah khawm uh hi. Ama pawini ahi, January 21 ni sial in Rome aom, ama biakinn pi ah Tuu nih ki go den in Pasian kiangah ap na ki nei den hi.
Tua Tuu no te mul pen ArchBishop te ii vang neihna khi in kingan aa, misiangtho Peter leh Paul te pawi pansik nitak in St. Peter biakinn pi’ Pasian tau tungah ki koih den hi. Tua vang neihna alak khi pen St. Peter leh ama zalaih te pan hong kizom suk ahi, uk na leh za neihna alak na in ArchBishop te ki-ap den hi. Misiangtho Agnes pen numeino te leh siangthona acing akem misiangtho in kiciamteh hi.
Misiangtho Agnes aw…Ko te adingin thu hong ngetsak tan.