The Chair of St. Peter Pawini (February – 22)

Tu ni pen The Chair of St. Peter pawini hi. Hih pawi pen kumzalom 4 hun pankipan pawlpi ki thutuahna lim lahna in Rome ah akibawl khin zo pawi khat ahi hi. The Chair cih kammal in thunei in thupi mahmah ahih manin a lianbel siampipa omna pen “Holy Chair” asiangtho tokhom cih khiatna anei, “Holy See” ci-in ki lo hi.
The Chair of St. Peter in Pawlpi tungah alian bel Siampipa ii thuhilh na (lamlahna), thuneihna limlak hi. Alian bel Siampipa in Pawlpi sungah upna tawh kisai thuhilhna te aneih ciangin athuneihna tokhom pan gen hi. February 22 ni-in Rome khuapi ah Misiangtho Peter in Siadaw za angah ni ahi hi. Pawlpi ngeina ah Missa bawl ciangin Misiangtho Peter zat suang tokhom pen Misiangtho Peter biakinnpi ii adawn ah kikoih hi ci hi.
Topa Jesu in Misiangtho Peter leh ama zalaih te, thu hilh theihna, thuneihna pia hi. Galilee tuipi gei ah Topa Jesu in “Nangin Petru na hi hi. Hih suang tungah ka pawlpi kalam ding hi. Tua pawlpi dawi gilote in zo lo ding hi. Vantung gam kong honna Tawhtang zong nang kongpia ding hi. Leitunga na hen khempeuh vantung ah kihen dinga, leitunga na phel khempeuh, vantung ah zong kiphel ding hi” (Mt 16:18-19) ci hi. Misiangtho Peter bangin Pope tampi te in (The Chair of St. Peter) Misiangtho Peter tokhom ah tu in upna leh zuihding thu te ahilh ciangin khial cih om ngei lo hi.