"Mawhna kisikkikna tawh kilawmin gah na gah un"

Catholic Nisim Lai Siangtho. Adventu Nipi Kaal (1) Na (SUN.) December 8.2019

Lungdamna Lai Siangtho. (Mt. 3: 1-12)

1. Tua hun laitakin Tuisawppa John Judea’ sehnel gam sungah hong pai a,

2. “Kisikkik un, bang hang hiam cih le vantung gam hong nai ta hi,” ci-in thu a tangko hi.

3. Hih in kamsangpa Isaiah’ tungtawn a a kigen thu ahi hi: “Sehnel gamah mi khat a kikona aw in: ‘Topa’ aading lam na sial un, ama totna ding lampi na tangsak un,’ a ci hi.”

4. Tu-in John in kalaoh mul kigan puansilhin, savun kawnggak tawh a kawng a gak hi; a an nek pen kauphe le gamlak khuaizu ahi hi.

5. Tua ciangin Jerusalem khua mite, Judea gam mite khempeuh le Jordan gun dunga omte khempeuh ama kiangah hong pai uh a,

6. a mawhnate uh suutin, Jordan gun sungah ama tung pan a kituisawp uh hi.

7. Ahi zongin amah in Pharisee-te le Sadducee-te tampitak kituisawp dingin hong pai a muh ciangin, amaute’ kiangah, “No, mualtan’ suan le khakte aw! Hong tung ding Pasian’ hehna panin na suahtak theihna ding uh kua in hong hilh ahi hiam?

8. Mawhna kisikkikna tawh kilawmin gah na gah un.

9. ‘Abraham in ka pu ka pa uh hi,’ ci-in kiphatsakpih kei un; bang hang hiam cih leh Pasian in hih suangtumte’ panin Abraham’ tate piangsak thei hi, cih kong gen hi.

10. Tu nangawnin singkung’ zungah hei khat kikoih khin ta hi; tua ahih manin gah hoih a gah lo singkung khempeuh kiphukin meikhuk sungah kikhul hi.

11. Kisikkikna dingin note tui tawh kong sawp a, ahi zongin kei’ nunga hong pai dingpa in kei’ sangin a vanglianzaw hi; keimah in ama khedap a tawisak(b) ding nangawnin ka kilawm kei hi; amah in note Kha Siangtho le mei tawh hong tuisawp ding hi.

12. Amah in lawhpi a khut ah tawi-in a buhphual hah siang dinga, a tak teng ansal sungah a koih ding hi, ahi zongin a si teng a mit ngeilo mei phual sungah a khul ding hi,” ci-in a tangko hi.

Hih in Topa’ lungdamna Lai Siangtho ahi hi.